Shkup, 8 qershor – Sindikata e UKIM-së kërkon nga Qeveria që sa më parë të mbajë mbledhje, në të cilën do të diskutohet për rritjen e pagave të punëtorëve dhe nënshkrimin e Marrëveshjes Kolektive.
“Shpresojmë që, si për profesionet dhe aktivitetet tjera në vend, të cilave pagat u rritën ndjeshëm dhe disa herë, Qeveria do të tregojë mirëkuptim dhe gatishmëri për të nënshkruar marrëveshjen tonë kolektive e cila do të sigurojë një pagë të mirë për punonjësit e UKIM. Në të kundërtën do të detyrohemi të organizojmë protesta para Qeverisë për mbrojtjen e të drejtave dhe standardit të punëtorëve të UKIM-së, thotë kryetari i Sindikatës së UKIM-së, prof. Dr Angel Ristov.
Për gjendjen e UKIM-it, Sindikata do të informojë edhe Misionin e Përhershëm të BE-së, Organizatën Ndërkombëtare të Punës, Sindikatat Ndërkombëtare në fushën e arsimit, Ambasadën e SHBA-së dhe vendet anëtare të BE-së.
Lidhja e Sindikatave të Universitetit “Shën Kirili dhe Metodi” më 2 qershor ka mbajtur një protestë paqësore para Rektoratit të UKIM-së, duke shprehur pakënaqësinë për përkeqësimin e gjendjes financiare të punëtorëve.
Më 2 qershor, ministri i Arsimit dhe Shkencës, Jeton Shaqiri, bëri thirrje që protesta të jetë paralajmërim, jo kërcënim për sesionin e qershorit të provimeve dhe të mos dëmtojë studentët. Rritja e pagave në arsimin e lartë, bëri të ditur ai, do të bëhet nga shtatori dhe kjo është parashikuar me ribalanc të Buxhetit.
