Shkup, 26 maj – Ribalanci i buxhetit është përgjigje ndaj krizës që nuk mund të parashikohej në periudhën kur po përgatitej Buxheti për vitin 2022 dhe përveç shkurtimeve, ka shtesa dhe riprioritet të mjeteve, tha sot ministri i Financave Fatmir Besimi.
Duke iu përgjigjur pyetjeve të gazetarëve pas konferencës së përbashkët për media me euroambasadorin Dejvid Gir, Besimi theksoi se pret që Kuvendi të caktojë seancë plenare për buxhetin plotësues në ditët në vijim.
“Me ribalancin i jepet përgjigje krizës. Masat e paralajmëruara po shihen. Pse po shkojmë me këtë ribalancim dhe çfarë duam të arrijmë – duhej të adresoheshin të gjitha çështjet e nevojshme, duke përfshirë mjete shtesë për krizën për masat për kategoritë e rrezikuara, të cilat do të jenë të përkohshme në varësi të nevojave, por edhe për të ruajtur politikat, që do të thotë ruajtjen e rritjes. Pasi shpenzimet janë rritur ndjeshëm dhe deficiti është rritur me 150 milionë euro. Me buxhetin plotësues ka shkurtime për rreth 13,4 miliardë denarë, por në të njëjtën kohë ka edhe shtesa”, tha Besimi.
Ai ka theksuar se ajo që është përfshirë në Propozim- ribalancin e buxhetit, pritet të realizohet.
Sipas tij, siç është rënë dakord me Qeverinë, në të gjitha institucionet ka shkurtime për 10 për qind për shpenzimet që nuk janë prioritare, gjegjësisht shpenzimet për mallra dhe shërbime, siç janë shpenzimet për inventar të imët, mobilie, vetura, si dhe ripriorizimi bëhet në lidhje me dinamikën e realizimit të disa projekteve. Ai theksoi se ka rritje në atë sociale dhe në bujqësi, ndërsa për masat kundër krizës janë paraparë 76 milionë euro.
Shpenzimet e udhëtimit, sqaroi Besimi, nuk i referohen institucioneve, por Zyrës për punë të përbashkëta të përgjithshme të dedikuara për refugjatët dhe personat e zhvendosur nga kriza në Ukrainë dhe Afganistan.
Ministri informoi se në javët në vijim do të ketë një dokument përfundimtar lidhur me financimin. “Është planifikuar financim i pjesshëm nga FMN, financim i pjesshëm për projektet nga institucionet financiare ndërkombëtare, si dhe pjesërisht nga BE-ja përmes programeve IPA ose Kornizës për Ballkanin Perëndimor. Ai do të financohet pjesërisht nga huamarrja në vend dhe në tregjet e huaja. Kemi rreth 200 milionë euro shlyerje borxhi”, tha Besimi.
