Qeveria i hap rrugë hulumtimit të antimonit në Kriva Pallankë, kompani australiane investon 5 milionë dollarë

Kriva Pallankë, 9 maj medial.mk/ – Qeveria i ka dhënë dritë jeshile një projekti për hulumtimin e rezervave të antimonit në minierën e vjetër “Krstov Doll” pranë fshatit Luke në Kriva Pallankë, ndërsa projekti do të realizohet me mbështetje financiare prej 5 milionë dollarësh nga Agjencia Shtetërore Amerikane për Financim të Zhvillimit Ndërkombëtar (DFC).

Marrëveshja u nënshkrua në selinë e DFC-së në Uashington mes Konor Kolman, përgjegjës për investime në këtë agjenci amerikane, dhe Nik Jovanovskit, drejtor ekzekutiv i kompanisë australiane “Pela Global Limited”.

Në ceremoninë e nënshkrimit morën pjesë edhe ministrja e Energjetikës, Minierave dhe Burimeve Minerale, Sanja Bozhinovska, si dhe ministri i Punëve të Jashtme, Timço Mucunski.

Kryeministri Hristijan Mickoski kishte paralajmëruar projektin rreth dhjetë ditë më parë, duke deklaruar se një kompani amerikane do të eksploatojë xehen e antimonit në rajonin e Kriva Pallankës, ndërsa përpunimi i saj pritet të bëhet në një shkritore në shtetin amerikan Oklahoma.

“Antimoni është mineral i rrallë dhe mund të ketë rëndësi të madhe për ekonominë tonë”, deklaroi Mickoski.

Miniera “Krstov Doll”, e vendosur rreth 20 kilometra nga Kriva Pallanka, nuk funksionon prej më shumë se 50 vitesh, por mbetjet nga eksploatimi i dikurshëm vazhdojnë të konsiderohen burim ndotjeje për ujërat sipërfaqësore. Në vitet ’60 dhe ’70 aty përpunohej xehe antimoni, ndërsa në disa raste edhe xehe molibdeni nga Turqia dhe xehe nga miniera “Allshar” pranë Kavadarit, e cila përmbante përqindje të lartë arseniku.

Projektin do ta zhvillojë kompania australiane “Pela Global Limited”, e cila merret me kërkime për ar, argjend dhe antimoni. Drejtori i saj, Nik Jovanovski, është australian me prejardhje maqedonase dhe tashmë ka investime në Maqedoninë e Veriut në sektorin e energjetikës dhe minierave.

Kompania “Pela Global Limited”, së bashku me Kisha Ortodokse Maqedonase, më 27 qershor 2025 kishte themeluar edhe kompaninë “Konstantin Energy DOO Shkup” për prodhimin e energjisë elektrike nga burime të ripërtëritshme.

Në faqen zyrtare të kompanisë thuhet se strategjia e saj është zhvillimi dhe rinisja e projektit të minierës së antimonit në “Krstov Doll”, si dhe kërkimi për ar në rajonin e Lukes pranë Kriva Pallankës.

Sipas kompanisë, prodhimi i koncentratit të antimonit në Maqedoninë e Veriut ka potencial të shndërrohet në një nga operacionet më të mëdha të nxjerrjes së antimonit në botë.