Shkup, 09 maj, medial.mk/ – Sot, më 9 maj, edhe në Maqedoninë e Veriut shënohet Dita e Evropës, një nga datat më të rëndësishme për kontinentin evropian, e cila simbolizon paqen, unitetin dhe bashkëpunimin mes popujve evropianë, shkruan medial.mk/.
Kjo ditë lidhet me Deklaratën Schuman të vitit 1950, kur ministri i Jashtëm francez, Robert Schuman, hodhi themelet e bashkëpunimit evropian që më pas çoi në krijimin e Bashkimit Evropian.
Në Maqedoninë e Veriut, Dita e Evropës shënohet me aktivitete të ndryshme institucionale, kulturore dhe edukative, të organizuara nga institucionet shtetërore, Delegacioni i Bashkimit Evropian dhe organizata të shumta vendore e ndërkombëtare.
Siç bëjnë të ditur organizatorët, fjalim zyrtar në këtë ngjarje do të ketë euroambasadori Michalis Rokas, duke filluar nga ora 12:00 në skenën “Shkolka”.
Mesazhe do të përcillen edhe përmes deklaratave për media nga euroambasadori Rokas, ministri për Çështje Evropiane Bekim Sali dhe kryetari i Qytetit të Shkupit Orce Gjorgjievski.– Programi përfshin lojëra dhe argëtim të organizuar nga vendet anëtare të BE-së, kënd ushqimi dhe stenda me produkte të ricikluara. Vizitorët do të kenë mundësi të edukohen për bimët dhe gjelbërimin urban, si dhe të njihen me biznese lokale ekologjike. Festa do të pasurohet me program muzikor dhe performanca live nga kompania e vallëzimit “Eureka”, Dina Jashari, Zvada, “Conquering Lion”, “DaPunk & Double G”, Emily Nas dhe Martina Peneva.
Dita e Evropës do të përfundojë në perëndim të diellit, kur ndërtesa e Qeverisë së Maqedonisë do të ndriçohet me ngjyrë blu – thuhet në njoftim.Programi organizohet nga Delegacioni i Bashkimit Evropian, rrjeti “Europe House” dhe ambasadat e vendeve anëtare të BE-së. Ministria për Çështje Evropiane dhe pushtetet lokale janë partnerë të ngjarjeve që do të mbahen gjatë gjithë muajit maj në mbarë vendin, ndërsa programi i plotë është i disponueshëm në rrjetet sociale dhe faqet zyrtare të organizatorëve.
Në fokus të aktiviteteve të sivjetme janë procesi i integrimit evropian, reformat, sundimi i ligjit, të drejtat demokratike dhe perspektiva evropiane e vendit.
Maqedonia e Veriut mbetet e përkushtuar në rrugën drejt anëtarësimit në Bashkimin Evropian, ndërsa Dita e Evropës konsiderohet si rikujtim i rëndësisë së bashkëpunimit, stabilitetit dhe vlerave të përbashkëta evropiane.https://medial.mk/
