Galileo - Page 3

Bitcoin rritet pas një komenti të Musk në Twitter

Bitcoin arriti vlerën më të lartë në dy javët e fundit ditën e Hënë pasi një cicërimë e bosit të Tesla Elon Musk se kompania mund ta ripërdorë kriptomonedhën nxiti entuziasëm tek komuniteti.

Pasi bleu 1.5 miliardë dollarë në Bitcoin në Shkurt, vlera e kriptomonedhës arriti në 60 mijë dollarë dhe asokohe Tesla tha se do ta pranonte si formë pagese.

Më vonë Musk tha se kompania nuk do ta pranonte duke qenë se energjia e konsumuar nga rrjeti i Bitcoin kontribuonte tek ndryshimet klimaterike.

“Kur 50% e energjisë së konsumuar nga Bitcoin është energji e pastër, atëherë Tesla do të lejojë transaksionet në Bitcoin,” tha Musk në Twitter të Dielën.

Bitcoin menjëherë reagoi duke u rritur me 9% pas mesazhit dhe në këto momente që shkruajmë tregtohet me 39,535 dollarë sipas CoinMarketCap.com.

Këtë vit vlera e Bitcoin 33% më e lartë se vitin e kaluar por kolapsoi nga rekordi prej 60 mijë dollarësh të muajit Prill. /PCWorld Albanian

 

Kryebashkiaku Veliaj në ICT Awards, Tirana së shpejti me Parkun Teknologjik

Kryetari i Bashkisë së Tiranë ishte prezent në Mbrëmjen Gala të evenimentit më të madh të teknologjisë në mbarë trevat Shqipfolëse, Albanian ICT Awards.

Gjatë fjalës së tij të rastit ai tha se “ICT Awards është shndërruar në një ikonë tashmë e qytetit të Tiranës” duke vlerësuar kontributin e dhënë ndër vite nga ky eveniment.

Nga skena e mbrëmjes gala ai tha se kishte bërë një premtim kur mori detyrën si kryetari i Bashkisë se brenda 10 viteve Tirana do të bëhej kryeqyteti dixhital i Ballkanit.

Ai shkoi më tutje duke dhënë një lajm të rëndësishëm. Parku i Ri në Kashar ku 50 hektarë do të shndërrohen në një park teknologjie për qytetin e Tiranës.

Mbrëmja Gala bashkoi profesionistë, ekspertë, akademikë, drejtues, vendimmarrës dhe politikëbërës në sektorin e Teknologjisë së Informacionit dhe Komunikimit. Ai theksoi se me ICT Awards të gjithë gëzojmë frytet e një sfide të përbashkët./PCWorld Albanian

Huawei: Ndërtojmë sistemin e parë plotësisht të automatizuar për makinat elektrike

Gjiganti Kinez i teknologjisë Huawei do të zhvillojë teknologji të makinave pa shofer për pasagjerët deri më 2025-ën tha një ekzekutiv i kompanisë ditën e Enjte.

Prodhuesi më i madh në botë i pajisjeve të telekomunikacionit ka nisur një përpjekje për të diversifikuar biznesin pas sanksioneve Amerikane.

Dhjetëra startupe e firma të mëdha teknologjike si Baidu në Kinë kanë shtuar përpjekjet për ndërtimin e sistemeve të vetëdrejtimit të cilët do të sjellin ndryshime drastike në industrinë e transportit.

Tashmë Huawei po i kthehen makinave elektrike inteligjente pasi biznesi global i smartfonëve u godit nga sansksioent Amerikane. Administrata e kaluar e Trump e kishte shpallur kompaninë kërcënim për sigurinë kombëtare.

“Objektivi ynë është të ndërtojmë një makinë të vërtetë pa drejtues deri më 2025,” tha wang Jun, drejtues i divizionit të makinave inteligjente të Huawei. /PCWorld Albanian

Live: Edicioni i 9-të i ICT Awards shpall fituesit

Gara më e madhe e teknologjisë në trevat shqipfolëse shpall sot fituesit në 8 kategori pas mëse 4 muajsh maratonë. Sot për këta sipërmarrës të rinj përmbyllet një aktivitet i cili dëshmon se asnjëherë më parë nuk ka qenë momenti më i mirë për inovacionin.

Një grup sipërmarrësish të rinj dhe inovativë të cilët kanë gjetur mundësi duke rivlerësuar plotësisht konceptin e suksesit. Duke përdorur fuqinë e teknologjisë, këta sipërmarrës të rinj shkëlqejnë sot si një dritë shprese duke gjetur mënyra inovative për ta bërë botën një vend më të mirë për tu jetuar.

https://www.facebook.com/pcworldalbanian/videos/141206781407958/?__cft__[0]=AZWpiSFGdVFOk7eE8OxQtErUOuHeuSNX38QLQ1UdXGfHOeIumfqE_MJKA2f5An3W37ytjOeixl-Q4C4timfeD7owv7g7uwIqRPAUf5HRgxVuZKATj_rP9twyGHOQkSk6-9-OjC4fm2vkKHv2szN7aKNETJq9ETH-fpu8NretKDvH-A5mZmO8HsIdb86BMhRW-6s&__tn__=%2CO%2CP-R

Gara e cila zyrtarisht hapet më 26 Mars, për herë të parë u organizua një eveniment plotësisht virtual, një hapje krejtësisht ndryshe nga vitet e kaluara për shkak të situatës së krijuar nga pandemia e Covid-19.

Edicioni i 9-të i Albanian ICT Awards nis misionin e tij këtë vit me mbështetjen e sponsorëve tradicionalë si Banka Raiffeisen, Fondacioni Dritan Hoxha, Albvision por edhe sponsorëve të rinj si Dev.al. Sponsorë dhe mbështetës të tjerë janë Albsoft, Baboon, AUK, Universiteti Metropolitan, Soft&Solution dhe 3i Solution.

Që nga themelimi ICT Awards ka vlerësuar mbi 1,000 projekte në fusha dhe kategori të ndryshme ndërsa 100 prej tyre janë shpërblyer.

Prova më e qartë se Microsoft do të prezantojë një Windows të ri

Spekulimet se Microsoft do të prezantojë një version të ri të Windows quajtur Windows 11, kanë pushtuar internetin dhe planet e kompanisë për të ndaluar mbështetjen e Windows 10 më 14 Tetor 2025 tashmë e konfirmojnë këtë.

Në faqen e Microsoft kompania thotë se do të vijojë të mbështesë Windows 10-ën deri më 14 Tetor 2025.

Është prova më e qartë se Microsoft po përgatit një version të ri të sistemit operativ dhe përdoruesit do të inkurajohen për të kaluar tek Windows i ri.

Në javët e fundit kompania ka folur për gjeneratën e re të Windows ndërsa më 24 Qershor do të mbajë një eveniment ku do të shpjegojë çfarë ka dashur të thotë me këtë.

Si rezultat shumë besojnë se Microsoft do të prezantojë Windows 11 e madje industria tashmë po bindet. Kujtojmë se kur debutoi në 2015-ën, Microsoft tha se Windows 10 do të ishte versioni i fundit i Windows dhe tashmë sistemi operativ do të merrte përditësime të vogla gradualisht dhe jo versione të mëdha. /PCWorld Albanian

Apple punëson ish ekzekutivin e BMW

Apple ka punësuar ish ekzekutivin e BMW Ulrich Kranz. Lajmi i dha nga Bloomberg ditën e Enjte duke thënë se ai ju bashkua Apple në javët e fundit.

Kranz ka shpenzuar 30 vite në BMW duke drejtuar kompaninë në zhvillimin e i3, makinës së parë plotësisht elektrike të BMW.

Pasi u largua nga BMW në 2017-ën, Kranz shkoi tek Faraday Future, të njëjtin vit që startupi i makinave elektrike të përfundonte në probleme serioze financiare.

Pas katër muajsh Kranz u largua nga Faraday për të bashkëthemeluar Canoo, një kompani që ndërtoi makinën elektrike MPDV1.

Në 2020-ën u përfol tek Apple ideja e blerjes së startupit. Bazuar në profilin e Kranz në Linkedin, ai është larguar nga Canoo në Prill. Afrimi i tij prej Apple është një përpjekje e qartë e Apple për të ndërtuar një makinë elektrike me sistem vetëdrejtimi. /PCWorld Albanian

Hakohet krijuesi i njohur i video lojërave, vidhen kodet burimore

Hakerët kanë vjedhur informacione shumë të vlefshme nga publikuesi i video lojërave Electronic Arts (EA) bëri të ditur kompania.

Sulmuesit kanë arritur të shkarkojnë kodin burimor të lojërave si FIFA 21 dhe motorin Frostbite përdorur në disa lojëra të profilit të lartë.

EA tha se asnjë informacion lojtari nuk është vjedhur. Lajmi u raportua i pari nga Vice me afro 780GB të dhëna të vjedhura.

Kompania është një prej krijuesve më të mëdhenj një botë të video lojërave me tituj si Battlefield, Star Wars: Jedi Fallen Order, The Sims dhe Titanfall.

Me vjedhjen e kodit burimor, hakerët mund ta përdorin për të hakuar pjesë të ndryshme të produkteve. Frostbite që hakerët pretendojnë se kanë kodin burimor, është një mjet i fuqishëm për krijimin e dhjetëra video lojërave nga FIFA tek Battlefield.

Hakerët tashmë mund të krijojnë kode manipuluese dhe hakime të ndryshme për lojërat. /PCWorld Albanian

Nga 1 Korriku heqja e tarifave roaming në Ballkanin Perëndimor

Këshilli Drejtues i Autoritetit të Komunikimeve Elektronike dhe Postare (AKEP) miratoi të mërkurën rregulloren e fundit të lidhur me heqjen përfundimtare të tarifave roaming në vendet e Ballkanit Perëndimor.

Rregullorja “Mbi Zbatimin e Politikës së Përdorimit të Drejtë dhe Metodologjinë e Vlerësimit të Qëndrueshmërisë së Heqjes së Tarifave Roaming me Pakicë me Ballkanin Perëndimor. Parashikon politikat e përdorimit të drejtë për të shmangur përdorimin abuziv apo anormal të shërbimeve të roaming pas datës 1 korrik 2021.

Duke filluar nga muaji i ardhshëm, hyn në fuqi detyrimi për heqjen e të gjitha tarifave roaming mes vendeve të Ballkanit Perëndimor. Përdoruesit e telefonisë celulare të Shqipërisë, Kosovës, Maqedonisë së Veriut, Malit të Zi, Serbisë dhe Bosnjë-Hercegovinës do të mund përdorin shërbimin roaming në rajon me të njëjtat tarifa si në vendin e tyre. Ky proces nisi në mesin e vitit 2019, me uljen e përshkallëzuar të tarifave roaming, deri në heqjen e plotë të tyre, në 1 korrik 2021.

Rregullorja e AKEP përcakton se operatorët celularë duhet të ofrojnë shërbime të rregulluara roaming me pakicë, sipas çmimeve përkatëse brenda vendit për pajtimtarët e tyre, të cilët zakonisht janë rezidentë në Shqipëri, në kohën që ata udhëtojnë në vendet e Ballkanit Perëndimor.

Për qëllime të një politike të përdorimit të drejtë, ofruesi i roaming ka të drejtë të kërkojë nga pajtimtarët e tij roaming të japin prova të qëndrimit apo banimit normal në Shqipëri, ose të lidhjeve të tjera të qëndrueshme me Shqipërinë, që sjell një prani të shpeshtë në territorin e Shqipërisë. Këto rregulla synojnë të shmangin përdorimin e roaming përmes operatorëve shqiptarë prej individëve që nuk janë rezidentë në Shqipëri.

Rregullorja e AKEP përcakton gjithashtu metodologjinë e vlerësimit në rastet kur operatorët celularë mund të kërkojnë zbatimin e një tarife shtesë në roaming. Megjithëse nga korriku, tarifat roaming në Ballkanin Perëndimor do të hiqen, rregullorja lë hapësira që operatorët të mund të kërkojnë vendosjen e tarifave shtesë, në rastet kur ata nuk janë në gjendje të mbulojnë kostot, gjë që sjell si pasojë dëmtimin e qëndrueshmërisë së tarifimit të shërbimeve brenda vendit.

AKEP mund të pranojë vendosjen e një tarife shtesë në roaming vetëm në rastet kur vlera absolute e marzhit neto negativ të shitjes me pakicë të roaming të aplikuesit është e barabartë ose më e madhe se 3% e vlerës së marzhit të tij të shërbimeve celulare. E thënë më thjeshtë, tarifat shtesë mund të vendosen në rastin kur humbjet në roaming tejkalojnë 3% të fitimet nga shërbimet celulare të operatorit aplikues.

Megjithatë, edhe kur provohet një diferencë e tillë, AKEP mund ta refuzojë aplikimin për tarifë roaming shtesë. Kjo mund të ndodhë kur operatori është pjesë e një grupi biznesi dhe ka prova të transferimit të brendshëm të çmimit në favor të filialeve të tjerë të grupit brenda Ballkanit Perëndimor, veçanërisht në funksion të disbalancave të konsiderueshme të tarifave të shitjes me shumicë të zbatuara brenda grupit.

Gjithashtu, kërkesa për tarifa shtesë do të refuzohet kur shkalla e konkurrencës në tregun brenda vendit krijon hapësira për të përballuar marzhet e reduktuara, ose kur zbatimi i një politike më kufizuese të përdorimit të drejtë do të ulte marzhin neto të shitjes me pakicë në roaming në më pak se 3%.

Gjithashtu, në rrethana të jashtëzakonshme, kur një operator ka një marzh negativ të shërbimeve celulare dhe një marzh neto negativ të shitjes me pakicë të roaming, AKEP do të autorizojë aplikimin e një tarife shtesë për shërbimet e rregulluara të roaming.

/Monitor

Çfarë është përgjysmimi i Bitcoin?

Çdo katër vite sasia e Bitcoin që shkon si shpërblim për gërmuesit e kriptomonedhave, reduktohet në një proces që njihet edhe si përgjysmimi i Bitcoin. Në këtë artikull shpjegojmë pse ndodh dhe si.

Limiti i furnizimit me Bitcoin

Për të kuptuar përgjysmimin e bitcoin, duhet të kuptojmë fillimisht teorinë pas furnizimit me Bitcoin.

Shpikësi Satoshi Nakamoto besonse se skarciteti do të krijonte vlerë. Në fund të fundit ka vetëm një pikë të Mona Lizës, disa të Picassos dhe një sasi të kufizuar e arit në Tokë.

Për këtë arsye u përcaktua se ky aset dixhital do të ishte i kufizuar në vetëm 21 milionë Bitcoin.

Ideja e kufizimit të Bitcoin është në kundërshti në mënyrë sesi dollari Amerikan apo paratë prej letre funksionojnë. Këto para u krijuan me rregulla të qarta ku për krijimin e një dollari Amerikan nevojitej një sasi e caktuar ai në rezerva. I njoh ndryshe edhe si standardi i arit.

Me kalimin e kohës këto rregulla ranë me modernizimin e ekonomive dhe pas kalimit të vështirësive financiare si Depresioni i Madh apo Lufta e Dytë Botërore ku nevojitet printimi i parave për të similuar rritjen ekonomive në vështirësi.

Satoshi Nakamoto besonte se ky zhvlerësim i parasë prej letre do të kishte efekte shkatërruese për bitcoin dhe kështu vendosir me një rresht kod të parandalonte një palë të printojë më shumë bitcoin.

Çfarë është përgjysmimi i bitcoin?

Integruar në kodin e bitcoin, është një limit prej 21 milionë monedhash. Bitcoinët e rinj hyjnë në qarkullim përmes një procesi që quhet gërmim. Gërmuesit bëjnë punën duke mirëmbajtur rrjetin dhe përpunuar transaksionet dhe si shpërblim marrin bitcoin të ri.

Megjithatë çdo katër vite shpërblimi përgjysmohet dhe së bashku me të bie ritmi i gërmimit të bitcoin derisa në vitin 2140 asnjë bitcoin të mos krijohet më.

Milioni i parë i bitcoin u gërmua nga Satoshi Nakamoto në 2009. Që atëherë afro 89% e sasi është gërmuar dhe vetëm 2.2 milionë bitcoin kanë ngelur për tu krijuar.

Historiku

  • 2009 – shpërblimi për gërmim blloku në bitcoin ishte 50 BTC
  • 2012 – përgjysmimi i parë redukton shpërblimin në 25 BTC
  • 2016 – përgjysmimi i dytë redukton shpërblimin në 12.5 BTC
  • 2020 – përgjysmimi i tretë redukton shpërblimin në 6.25BTC
  • 2140 – përgjysmimi i 64-rt ndodh se asnjë bitcoin nuk krijohet më

Çfarë ka të veçantë me përgjysmimin?

Nëse një person, grup apo qeveri e një vend i besohet furnizimi me para, ka arsye pafund gjithashtu pse nuk duhet të besohen. Bitcoin është krijuar për të qenë i decentralizuar dhe i besueshëm ku askush nuk e kontrollon.

Duke qenë se nuk kontrollohet nga një individ, grup apo shtet, është e vështirë të vendoset rregulla për mënyrën sesi krijohen ato.

Duke përcaktuar furnizimin total dhe aplikuar përgjysmimin, sistemi monetar i Bitcoin bëhet i pamundur për tu ndryshuar. Kjo e bën bitcoin të ngjashëm me arin.

Çfarë ndodh me gërmuesit?

Gërmuesit e bitcoin investojnë para në blerjen e harduerëve të specializuar dhe paguajnë elektricitet. Kostoja e tyre kompensohet nga shpërblimi prej gërmimit, por çfarë ndodh kur shpërblimi përgjysmohet?

Duke qenë se përgjysmimi redukton shpërblimin, edhe incentiva për gërmuesit të punojnë në rrjetin e bitcoin reduktohet me kalimin e kohës dhe të të njëjtën kohë me më pak gërmues bie siguria e rrjetit.

Për këtë arsye sapo bitcoin i fundit të gërmohet. Gërmuesit do të marrin shpërblime në formën e tarifave të transaksioneve për mirëmbajtjen e rrjetit Bitcoin.

Aktualisht këto tarifa përbëjnë vetëm një sasi të vogël të të ardhurave totale. Aktualisht gërmuesit gërmojnë 900BTC në ditë, por fitojnë mes 60 deri në 100 BTC në tarifa për transaksionet.

Me pak fjalë tarifat aktualisht përbëjnë 6.5% të të ardhurave por në 2140 do të përbejnë 100%.

Si ndikon përgjysmimi në çmimin e Bitcoin?

Debati nëse përgjysmimi ndikon në çmimin e bitcoin vijon edhe sot e kësaj dite. Normalisht duhet të rritet kërkesa dhe si rezultat çmimi.

Historikisht gjatë përgjysmimeve të kaluara, çmimi i bitcoin është rritur por edhe faktorë të tjerë kanë ndikuar. Në Qershor të 2016-ës bitcoin ishte rreth 660 dollarë pas përgjysmimit por vijoi pa ndryshim për ca ditë derisa ra në 533 dollarë në Gusht.

Më pas u rrit në rekorde prej 20,000 dollarë. Ngjashëm me 2020-ën, bitcoin u rrit nga 9 mijë dollarë në 27 mijë dollarë në fund të vitit. /PCWorld Albanian

Varianti buxhetor i familjes Galaxy S21 zbulohet në detaje

Smartfoni i ardhshëm i Samsung, Galaxy S21 FE, do të vijë në tre në një varietet ngjyrash, disa prej të cilave u zbuluan gjatë kësaj jave.

Imazhe të reja të Galaxy S21 FE në ngjyrë jeshile, të bardhë, blu, violet dhe gri tregojnë smartfonin nga çdo kënd, para dhe pas.

Në bazë të këtyre imazheve shohim një kornizë metalike dhe kapakë të pasmë prej plastike së bashku me ekranin Infinity-O në pjesën ballore.

Korniza e smartfonit akomodon butonat e ndezjes dhe volumit të bashku me grilën e altoparlantit dhe portën USB-C në fund. Ashtu si Galaxy S20 FE, modeli i ardhshëm nuk ka një portë kufjesh 3.5mm.

Dizajni i kamerë së pasme është marrë nga familja e rangut të lartë Galaxy S21 dhe S21+. Smartfoni i ri do të debutojë në dy muajt ardhshëm dhe më përpara është shfaqur në testime online me çipin Snapdragon 888 dhe 6GB RAM.

Një variant me procesor Exynos nuk do të mungojë ndërsa mediat Koreane thonë se ka për të kushtuar 100 dollarë më pak sesa paraardhësi. /PCWorld Albanian