Votimi nga jashtë, Celibashi: Të refuzuarit mund të ankohen në Gjykatën e Tiranës brenda 11 prillit

Komisioni Qendror i Zgjedhjeve (KQZ) përfundoi sot shqyrtimin e kërkesave të shtetasve shqiptarë që jetojnë jashtë vendit për t’u regjistruar në Platformën Elektronike të Regjistrimit (PER), dhe sipas të dhënave 245 975 zgjedhësve u është miratuar kërkesa për të votuar në zgjedhjet parlamentare të 11 majit.

Në një konferencë për mediet, Kryekomisioneri Shtetëror i Zgjedhjeve, Ilirjan Celibashi dha disa detaje nga aplikimet në PER të shtetasve shqiptarë. Numri më i lartë i kërkesave është regjistruar më datën 2 mars, ndërsa numri mestar i kërkesave gjatë ditës ka qenë 6900.

Sipas Celibashit “aplikimi i parë është bërë nga një shtetas nga Gjermania më datë 11 janar, ora 00:08, aplikimi i është pranuar”.

Për sa i përket moshës, Celibashi tha se regjistrimi me “moshën më të madhe është një shtetas nga Gjermania 98 vjeç, i datëlindjes 1927, nëse nuk gaboj, ia ka dalë herën e parë të regjistrohet”.

Kryekomisioneri tha po ashtu se “një shtetas ka aplikuar 25 herë në platformë, është regjistruar”.

I pyetur se çfarë do të bëhet me 48 180 zgjedhësve të cilëve iu është refuzuar kërkesa, Celibashi tha se për kategorinë që kanë marrë refuzim nga KQZ nuk mund të bëhet asgjë.

“Ajo çfarë parashikohet në Kodin Zgjedhor dhe në aktet rregullatore, është sa vijon, nga data 9 mars deri në 12 vetëm ata që janë të regjistruar, kanë të drejtë sipas përcaktimeve përkatëse të kërkojnë të bëjnë ndryshime që lidhen me adresën dhe vetëm me adresën të të dhënave që kanë në PER dhe asgjë më shumë. Ky dyditësh është për ata që janë të regjistruar”, tha Celibashi.

“Për kategorinë e atyre që kanë marrë refuzim nga KQZ nuk mund të bëhet asgjë dhe kjo është e qartë si në Kodin Zgjedhor dhe në aktet rregullatore, për momentin që flasim”, tha Celibashi.

I pyetur se ku mund të ankohet zgjedhësi pas refuzimit të kërkesës nga ana e KQZ-së, Celibashi tha se mund të ankohen në Gjykatën e Rrethit Gjyqësor Tiranë, jo më vonë se data 11 prill.

“Nga momenti që i është refuzuar kërkesa, deri në 11 prill mund të paraqesin një ankesë nëpërmjet një platforme online, e cila do të ndërtohet nga KLD, tashmë që edhe kuadri ligjor ia lejon ndërtimin e kësaj platforme, mund të bëhet aplikimi, dhe uroj të funksionojë”, tha Celibashi.

Celibashi shtoi se “refuzimet e bëra nga ana e KQZ janë të gjitha të përligjura, vjen si rrjedhoje e gabimeve të atyre zgjedhësve”.