Kërcënonte babain se do ta vriste me hanxhar, policia arreston 25-vjeçarin dhe parandalon krimin në Lushnjë

Policia e Shtetit ka njoftuar sot se ka arritur të parandalojë një ngjarje të mundshme kriminale në familje në qytetin e Lushnjës.

Policia ka arrestuar shtetasin A. Q., 25 vjeç pasi mori njoftimin se ai ushtronte dhunë ndaj babait të tij dhe e kanoste se do ta vriste me mjet prerës.

“Në sallën operative të Komisariatit të Policisë Lushnjë ka ardhur një telefonatë nga shtetasi A. Q., 56 vjeç, i cili ka kërkuar ndihmën e policisë, pasi i biri po ushtronte dhunë fizike ndaj tij dhe po e kanoste për ta vrarë me mjet prerës”, ka thënë policia.

“Me marrjen e njoftimit, menjëherë shërbimet e Policisë kanë shkuar në adresën e dhënë në fshatin Krutje, ku është bërë e mundur kapja dhe neutralizimi në kohë e autorit, i cili i ka kërcënuar shërbimet e policisë se do të dëmtonte ata ose veten, në rast se do të ndërhynin”, ka shtuar policia.

Gjithashtu u sekuestrua në cilësinë e provës materiale mjeti prerës (hanxhar), me të cilin 25-vjeçari kanosi për të vrarë babanë e tij.

Materialet procedurale i kaluan Prokurorisë pranë Gjykatës së Shkallës së Parë Lushnjë, për veprime të mëtejshme.