Njoftohet se Ministria jashtme e Francës, ka kërkuar nga komuniteti kulturor që të mos ftojnë artistë nga Nigeri, Mali dhe Burkina Faso, transmeton Anadolu.
Sipas lajmit të radios France Inter, vihet në dukje se Ministria Jashtme e Francës ka kërkuar nga komuniteti kulturor që të mos ftojnë artistë nga Nigeri, Mali dhe Burkina Faso.
Kjo kërkesë e ministrisë bëhet e ditur se është përcjellë përmes dërgimit të një letre Drejtorive Rajonale për Çështjet e Kulturës dhe institucioneve kulturore publike.
Në letër thuhet se deri në një udhëzim të dytë nga ministria e jashtme janë pezulluar të gjitha bashkëpunimet me Nigerin, Malin dhe Burkina Fason dhe se qytetarët e këtyre vendeve nuk duhet të ftohen.
Në një deklaratë të bërë nga Ministria franceze e Kulturës, vihet theksi se nga ministria e tyre ose nga Ministria e Jashtme nuk është kërkuar anulimi i skenës për asnjë artist pavarësisht kombësisë së tyre.
Po ashtu në deklaratë bëhet e ditur se që nga 7 gushti Franca ka pezulluar dhënien e vizave për ata që vijnë nga Nigeri, Mali dhe Burkina Faso dhe se ky vendim nuk prek vizat e dhëna para datës në fjalë ose për ata që jetojnë në një vend tjetër përveç Francës.
Sindikata e institucioneve të artit dhe kulturës (Syndeac) ka kërkuar një mbledhje urgjente me Ministrinë e Jashtme për ndryshimin e këtij vendimi të marrë kundrejt artistëve të tri vendeve afrikane në fjalë.
Në anën tjetër, kryetarja e bashkisë së Parisit, Anne Hidalgo në një deklaratë të bërë nga platforma e medias sociale “X” njoftoi se Bashkia e Parisit nuk ka ndërprerë bashkëpunimin me artistët nga Nigeri, Mali dhe Burkina Faso.
“Kultura, artistët mbartin një shpresë që njerëzimi nuk mund të heqë dorë”, është shprehur Hidalgo.
– Zhvillimet në marrëdhëniet e Francës me Malin, Burkina Fason dhe Nigerin
Pas tensionit diplomatik mes Francës dhe Malit, qeveria e Parisit në vitin 2022 tërhoqi ushtarët e fundit të saj që ndodheshin në këtë vend në kuadër të operacionit “Barkhane”.
Administrata ushtarake, e cila më 26 korrik kaloi në krye të Nigerit, më 25 gusht i dha 48 orë ambasadorit francez në Niamey, Sylvain Itte, që të largohej nga vendi, por ambasadori nuk u largua.
Burkina Faso në janar të këtij viti kërkoi largimin e ushtarëve francezë që ndodheshin në vend në kuadër të operacionit “Sabre”. Franca pranoi tërheqjen e ushtarëve të saj.
