Presidenti amerikan Xho Bajdeni sot nënshkroi urdhër ekzekutiv që mundëson përparim në zbatimin e kornizës së re për transferimin e të dhënave personale nga Bashkimi Evropian në SHBA, që është kyçe për ekonominë digjitale, lajmëruan një pjesë e mediave botërore.
Në mars, Uashingtoni dhe Brukseli në parim ranë dakord rreth kësaj çështje, të kontestueshme prej kohësh, sepse propozimet e mëparshme për një marrëveshje u refuzuan nga Gjykata e Drejtësisë e BE-së për shkak të frikës nga programi amerikan për përgjim.
Nënshkrimi i dekretit nga ana e presidentit do t’i mundësojë Komisionit Evropian ta fillojë procesin e vet të ratifikimit, për çfarë do të duhen disa muaj.
“Ky është fundi i përpjekjeve tona të përbashkëta për ripërtëritjen e besimit dhe stabilitetit në shkëmbimin transatlantik të të dhënave”, theksoi sekretarja amerikane e tregtisë, Xhina Rajmondo.
Teksti i përforcon masat për garantimin e konfidencialitetit dhe mbrojtjen e lirive civile në programet amerikane për mbikëqyrje mbi të dhënat e mbledhura në Evropë, që transferohen dhe ruhen përtej Atlantikut.
Gjithashtu vendos mekanizëm të pavarur dhe detyrues që individëve nga vendet e pranueshme u mundëson të kërkojnë kompensim, nëse vlerësojnë se shërbimet e inteligjencës amerikane kanë mbledhur në mënyrë të paligjshme të dhënat e tyre personale.
Ky mekanizëm parashikon dy faza të padisë, njëra që i shkon nëpunësit përgjegjës për mbrojtjen e lirive civile në administratën e inteligjencës amerikane, ndërsa e dyta në një gjykatë të pavarur të themeluar nga Ministria e Drejtësisë.
Gjykata në korrik të vitit 2020 vendosi se “Prajvesi shild” (Privacy Shield), që e përdorin 5.000 kompani amerikane, duke përfshirë disa të mëdha si “Gugëll” dhe “Amazon”, nuk mbron nga “ndërhyrja e mundshme në të drejtat themelore të njerëzve të dhënat e të cilëve shkëmbehen”.
Ekziston mundësi që versioni i ri i marrëveshjes sërish të përfundojë në gjykatë, pranuan zyrtarë të administratës amerikane.
Por sipas tyre, është krijuar për t’iu përgjigjur dyshimeve paraprake të gjyqësorit evropian.
