Pas humbjes së shumicës parlamentare, Macron nis bisedimet me partitë e tjera për të shpëtuar qeverinë

Presidenti francez ka nisur përpjekjet për të ruajtur pushtetin, pasi humbi shumicën parlamentare në zgjedhjet e së dielës. Macron do të zhvillojë bisedime me përfaqësuesit e partive kryesore politike të Francës për të gjetur një zgjidhje politike, sipas BBC.

Ai është nën trysni për të siguruar mbështetjen e rivalëve për të përmbushur agjendën e reformave të qeverisë së tij. Por as e djathta ekstreme e Marin Le Pen dhe as aleanca e majtë e Jean-Luc Mélenchon nuk duan të bashkëpunojnë me të.

Kjo nënkupton se presidentit i duhet të fitojë mbështetjen parlamentarëve nga e majta dhe e djathta për të formuar një shumicë funksionale. Analistët parashikojnë se një ujdi mund të arrihet me republikanët e krahut të djathtë edhe pse lideri Christian Jacob deri më tani e ka përjashtuar një mundësi të tillë.

“Është jashtë diskutimit mundësia e një marrëveshje me qeverinë apo çdo lloj koalicioni. Ne jemi në opozitë me partinë e Macron dhe po ashtu me partinë nacionaliste të Le Pen dhe të majtën ekstreme”.

Përfaqësues të partive do të vizitojnë pallatin Elize për bisedime të nivelit të lartë, të martën dhe të mërkurën.

Siç mësohet, Le Pen është shprehur e gatshme të takojë Macron, por Melenchon jo. Bisedimeve u janë përgjigjur pozitivisht edhe lideri i socialistëve Olivier Faure dhe numri një i partisë komuniste, Fabien Roussel.

Qeveria franceze e qendrës po përpiqet dëshpërimisht të shmangë një paralizë politike pas humbjes së shumicës. Qeveritë e pakicës janë diçka e rrallë në Francë, dhe koalicionit të Macron i duhen plot 44 vende për kontrollin e asamblesë.