Parlamenti i Finlandës ka hapur debatin nëse do të kërkohet anëtarësimi në NATO, pasi pushtimi rus i Ukrainës çoi në një rritje të mbështetjes politike dhe publike për t’iu bashkuar aleancës ushtarake.
Sipas Guardian, rreth gjysma e 200 deputetëve të Finlandës mbështesin anëtarësimin në NATO, ndërsa rreth 12 e kundërshtojnë atë. Efekti parandalues në mbrojtjen e Finlandës do të ishte dukshëm më i madh si një anëtare e NATO-s, thuhet në raport.
Kryeministrja e Finlandës, Sanna Marin, tha se vendi i saj do të vendoste “shumë shpejt, brenda javësh” nëse do të aplikonte për anëtarësim. Ligjvënësit në Eduskunta të Finlandës javën e kaluar morën një “letër të bardhë” të porositur nga qeveria që vlerësonte implikimet e anëtarësimit në NATO.
Raporti nuk bëri rekomandime, por theksoi se pa anëtarësimin në NATO, Finlanda nuk gëzon asnjë garanci sigurie pavarësisht se aktualisht është partnere e aleancës.
Suedia po diskuton gjithashtu nëse do të paraqesë një ofertë anëtarësimi.
