Lindi katër muaj para kohe dhe peshonte 212 gramë, ishte vetëm 24 centimetra – pas trajtimit 13-mujor vogëlushja nga Singapori lirohet nga spitali

Foshnja më e vogël në botë është liruar nga spitali pas 13 muajve që i kaloi në një spital në Singapor, shkruan BBC.

Kvek Ju Siuan peshonte vetëm 212 gram kur lindi – që i bie se peshonte sa një mollë dhe i kishte vetëm 24 centimetra, transmeton Telegrafi.

Ajo lindi në javën e 25-të, që i bie larg terminit të paraparë nga mjekët. Nëna e saj e lindi me prerje cezariane katër muaj para kohe – pasi u diagnostikua me preeklampsi – presionin e madh të gjakut që ka mundur të jetë fatal për nënën dhe foshnjën.

Ju Siuan që kishte gjasa të vogla për të jetë, tani i ka 6.3 kilogramë dhe pasi është konstatuar se gjendja e saj shëndetësore është stabilizuar, mjekët e liruan së bashku me të ëmën.

Gjatë qëndrimit në spital, Ju Siuan i është nënshtruar trajtimeve të ndryshme, është futur në aparate të ndryshme për të mbijetuar.

E prindërit e saj kanë arritur t’i mbulojnë shpenzimet e mjekimit, falë fushatës për ndihmë në të cilën mblodhën plotë 270.601 dollarë.