“Lajeni gojën para se të flisni për mua dhe Evertonin”, Richarlison i kundërvihet Carragherit

Rivaliteti mes Liverpoolit dhe Evertonit ekziston në jetën e përditshme në Merseyside dhe Richarlison u bë edhe më i dashur për tifozët e Toffees, pasi në orët e para të mëngjesit të sotëm (e premte) ka goditur me fjalë legjendën e Reds, Jamie Carragher.

Richarlison është njëri nga më të preferuarit e tifozëve në Goodison Park, por ai ka shtuar reputacionin e tij duke vënë në shënjestër ish-mbrojtësin e Liverpool .

Pasi shënoi një gol në një fitore dramatike me rikthim ndaj Crystal Palace, një rezultat që i lejoi Evertonit të siguronte ekzistencën edhe për një sezon në Ligën Premier, braziliani shkoi në Twitter për të dërguar disa fjalë për Carragher.

“Lajeni gojën para se të flisni për mua dhe Evertonin dhe unë nuk ju respektoj”, ka shkruar Richarlison në profilin e tij privat.

I gjithë ky mllef i brazilianit erdhi pas disa kritikave të Carragher në mediumet angleze për paraqitjen e tij dhe skuadrës nga Goodison Park.

Ndryshe, Carragher njihet si legjendë e Liverpoolit, rivalit më të madh të Evertonit.