Shkup, 3 shkurt – Përpjekjet e ndërsjella për sundimin e ligjit dhe funksionimin e sistemit juridik, si dhe konstatimin e sfidave dhe aspekteve pozitive të ndryshimeve që dalin nga miratimi i akteve të brendshme në Gjykatë, ishin temë e diskutimit në takimin e sotëm mes kryetares së Gjykatës Kushtetuese Dobrilla Kacarska dhe ministrit të Drejtësisë Nikolla Tupançeski.
Po ashtu, siç njoftojnë nga Gjykata Kushtetuese, kryetarja Kacarska ka shprehur shqetësimin për funksionimin e Gjykatës me katër gjykatës më pak se sa parashihet me Kushtetutë. Të dyja palët ranë dakord se kjo është një çështje me interes të lartë për shtetin dhe mbrojtjen e rendit kushtetues dhe duhet të zgjidhet sa më parë.
Kryetarja Kacarska e informoi ministrin e Drejtësisë për problemet e Gjykatës në aspektin e hapësirës, nevojën për pajisjen e dhomës së serverëve, rritjen e kapaciteteve të stafit, si dhe nevojën për rregullimin ligjor të statusit material të gjykatësve kushtetues dhe punonjësve të Gjykatës.
Ministri Tupançeski e konfirmoi rolin kyç të Gjykatës dhe u zotua për bashkëpunim dhe mbështetje të rregullt në të ardhmen duke bërë përpjekje maksimale për forcimin e kapaciteteve të këtij institucioni. Në këtë kontekst, u shkëmbyen mendime për aksesin në pavarësinë e plotë funksionale dhe financiare të Gjykatës përmes shembujve krahasues nga vendet evropiane.
Ministri njoftoi edhe mbështetjen përmes “IPA 3”, e cila parashikon forcimin e kapaciteteve dhe efikasitetit të Gjykatës duke mbështetur ndryshimet në Rregulloren e Gjykatës, trajnime dhe vizita studimore të gjykatësve dhe shërbimit profesional dhe përmirësimin e infrastrukturës së TI-së të Gjykatës Kushtetuese.
