Shkup, 2 shkurt – Deri në vitin 2023, parashohim ulje të tatimit të personal në sektorin TI nga 10 në 0 për qind, që do të jetë një nxitje e fortë për të rinjtë që të fokusohen më shumë drejt këtij sektori ku dita ditës nevojiten më shumë punëtorë, paralajmëroi kryeministri Dimitar Kovaçevski.
Ai sot ishte për vizitë në kompaninë “Mexhiks” të themeluar nga sipërmarrësja e re Katerina Zdraveska me përdorimin e masës për vetëpunësim të Ministrisë së Punës dhe Politikës Sociale.
Kryeministri njoftoi se deri në vitin 2023 parashihen një sërë masash stimuluese në sektorin e TIK-ut, përveç uljes së tatimit personal nga 10 për qind aktualisht në 0 për qind, përjashtim nga tatimi për rikualifikim, trajnime, trajnime shtesë në kompanitë, përjashtim nga tatimi nga kostoja e licencës për industrinë TI.
Kovaçevski, informojnë nga shërbimi për shtyp, i uroi suksese kësaj kompanie të re të specializuar për zbatimin e algoritmeve të inteligjencës artificiale, duke theksuar se sipërmarrësit kanë mbështetje të fuqishme nga Qeveria e Republikës së Maqedonisë së Veriut e cila do të vazhdojë të investojë në kompani me perspektivë.
“Mbështetja financiare e Qeverisë për kompanitë dhe startup-et premtuese në sektorin e TIK-ut do të vazhdojë dhe do të rritet. Çdo punë e re në këtë industri nënkupton pozitë të mirëpaguar, karrierë të sigurt dhe zhvillim të rinisë dhe në fund zhvillim të ekonomisë dhe rritje të standardit jetësor në vend”, tha kryeministri Kovaçevski, së bashku me të cilin për vizitë në “Mexhiks” ishin ministrja e Punës dhe Politikës Sociale, Jovana Trençevska dhe drejtori i Agjencisë për Punësim, Bekim Murati.
Me këtë rast, kryeministri u shpreh i kënaqur me rezultatet e planit operativ për punësim me shfrytëzim mbi 92 për qind, që vërteton se paratë po investohen si duhet. Gjithashtu, trajnimet për zhvillimin e aftësive digjitale kanë realizim 100 për qind, dhe vetëm falë kësaj mase 400 persona të papunësuar kanë fituar aftësi digjitale falë kësaj mase.
“Për shkak të efikasitetit dhe interesimit të madh vitin e kaluar, në vitin 2022 kemi krijuar Planin Operativ në vlerë prej 28 milionë euro. Është 230 milionë denarë më shumë se vitin e kaluar”, nënvizoi Kryeministri Kovaçevski.
Sektori i TIK-ut në Maqedoninë e Veriut në vitet e fundit shënon rritje të vazhdueshme lidhur me numrin e kompanive dhe të punësuarve, rritje të eksportit dhe të ardhurave. I kemi shndërruar përpjekjet tona për përmirësimin e mëtejshëm të kushteve të punës dhe rritjen e kësaj industrie në masa konkrete me kërkesë të sektorit.
