Kalvin Phillips u rikthye nga detyra në Kupën e Botës me Anglinë në mbipeshë dhe jo i gatshëm për tu paraqitur kundër Liverpoolit, sipas trajnerit të Manchester Cityt, Pep Guardiola.
Mesfushori e ka kaluar një periudhë jo të mirë deri tani te City për shkak të lëndimeve që prej se kaloi në “Etihad” nga skuadra e Leeds United.
Pavarësisht lëndimeve, Phillips ishte përzgjedhur nga Gareth Southgate për të qenë pjesë e skuadrës së Anglisë në Botërorin “Katar 2022”, por luajti vetëm 40 minuta përgjatë turneut para se “Tre Luanët” të eliminoheshin në çerekfinale nga Franca.
27 vjeçari, i cili ka arritur ta bëjë vetëm një paraqitje si zëvendësues në Premier Ligë me Cityn, mungoi në raundin e katërt të Carabao Cup në fitoren kundër Liverpoolit.
Kur bashkëlojtarët e tij anglez Jack Grealish, John Stones dhe Phil Foden u paraqitën në ndeshjen e parë pas Kupës së Botës, Guardiola sugjeroi se përgatitja fizike e Phillips ishte nën standardet e pritura.
“Ai nuk është i lënduar. Ai erdhi në mbipeshë. Nuk e di pse”, tha Guardiola.
“Ai nuk u rikthye në kondicion për të bërë seancat stërvitore dhe për të luajtur”, shtoi më tej trajneri i Cityt.
Guardiola gjithashtu e konfirmoi se Ruben Dias i është bashkuar Phillips për rehabilitim pasi që e pësoi një lëndim në muskul në humbjen e Portugalisë ë çerekfinale ndaj Marokut në Kupën e Botës.
