Ferrari me të cilin Michael Schumacher fitoi titullin e tij të gjashtë në F1 është shitur për gati 15 milionë dollarë

Ferrari F2003-GA, në të cilin Michael Schumacher fitoi titullin e tij të gjashtë të pilotit në F1 arriti të shitej në një ankand të RM Sotheby’s me një vlerë të pabesueshme 14,630,000 dollarë.

Sipas mediave të huaja, përcjell Telegrafi, ky çmim është pothuajse dyfishi i rekordit të mëparshëm prej 7,504,000 dollarësh të vendosur në vitin 2017 nga Ferrari F2001, i cili u drejtua gjithashtu nga legjenda Michael Schumacher.

Një çmim i tillë është gjithashtu shumë përtej vlerësimeve origjinale nga vlerësuesit e RM Sotheby’s, të cilët prisnin që ajo të shitej për diçka midis 7.5 dhe 9.5 milionë dollarë, pikërisht përpara ankandit të 9 nëntorit.

Siç do të prisnit nga një automjet prej 14,6 milionë dollarësh, Ferrari F2003-GA është mbajtur në gjendje të mirë dhe është gati të dalë në pistë.

Makina e garave u vu në lëvizje së fundmi nga Mick Schumacher, i cili pati fatin të drejtonte një nga makinat më ikonike njëvendëshe nga karriera e shkëlqyer e babait të tij.