Calhanoglu: Fitorja ndaj Barcelonës mund ta ndryshojë sezonin e Inter

Hakan Calhanoglu është shprehur tejet i lumtur me fitoren e Inter ndaj Barcelonës.

Mesfushori turk, Calhanoglu ishte ai që vendosi fatin e takimit të mbrëmshëm mes Inter dhe Barcelona, me një gol të shënuar nga distanca.

Pas ndeshjes, lojtari ka dhënë disa komente. Ai beson se fitorja e mbrëmshme mund të jetë pika e kthesës për sezonin e ‘Zikaltërve’.

“Ishte shumë me rëndësi që të fitonim, duhej të dërgonim një sinjal mbi të gjitha për tifozët, të cilët janë gjithmonë afër nesh”, ka thënë Calhanoglu.

“Kjo ndeshje mund vërtet të ndryshojë sezonin tonë, sepse ne mund të ndërtojmë mbi të. Sa për kualifikimin, duhet të qëndrojmë të qetë dhe të marrim lojë pas loje”, shtoi turku.

Calhanoglu shënoi mbrëmë golin e parë pas pesë viteve në Champions League. I fundit gol për të ishte me fanellën e Bayer Leverkusen, në shtator të vitit 2016.