Kërçovë, 15 maj, medial.mk/ – Kryeministri Hristijan Mickoski deklaroi sot nga Kërçovë se Qeveria do të vazhdojë të mbështesë zhvillimin e komunës, duke theksuar se tashmë kanë nisur të shihen rezultatet e para pas, siç tha ai, viteve të stagnimit.
Mickoski vlerësoi se në Kërçovë po realizohet një agjendë ambicioze zhvillimore dhe shprehu bindjen se projektet e nisura do të përfundojnë me sukses.
“Po ndërtohet dhe po zhvillohet, po i përmbushim premtimet e dhëna para kërçovarëve. Nga kjo që mund të shohim, bëhet fjalë për një agjendë mjaft ambicioze dhe jam i bindur se të gjitha këto projekte të nisura edhe do të përfundohen”, deklaroi Mickoski.
Ai falënderoi kryetarin e komunës, këshilltarët komunalë dhe administratën lokale për angazhimin në realizimin e projekteve, duke theksuar se bashkëpunimi mes pushtetit lokal dhe atij qendror është kyç për zhvillimin e komunës.
Kryeministri po ashtu falënderoi ministrat dhe deputetët që ishin të pranishëm gjatë vizitës, duke veçuar ministrin për Politikë Sociale, Demografi dhe Rini, si dhe zëvendësministrat në Ministrinë e Mjedisit Jetësor dhe Planifikimit Hapësinor dhe Ministrinë e Administratës Publike.
Sipas tij, deputetët nga rajoni po japin kontribut maksimal për sigurimin e sa më shumë projekteve për Kërçovën.
“Si Kryetar i Qeverisë, ashtu si deri më tani edhe tani e tutje do t’i mbështes të gjitha këto iniciativa që vijnë nga Komuna e Kërçovës”, theksoi Mickoski.
Ai shtoi se Qeveria do të vazhdojë me realizimin e projekteve dhe premtimeve të dhëna ndaj qytetarëve të Kërçovës.
