Turizmi në rritje, në janar-prill Shqipërinë e vizituan rreth 1.7 milionë të huaj

Teksa turet kulturore në doza të moderuara ishin përfaqësuesit tipikë të turistëve në muajt e parë të vitit, me rritje të dukshme më pas në maj-qershor kur nisnin charterat e parë me pjesën e organizuar, duket se viti 2023 ka përmbysur këtë situatë për turizmin në Shqipëri.

Flukset turistike në rritje janë raportuar që në muajt e parë të vitit, ku sipas shifrave të Institutit të Statistikave, në janar-prill kanë hyrë në vendin tonë rreth 1.7 milionë të huaj.

“Numri i shtetasve të huaj që kanë hyrë në territorin shqiptar është 614,256. Ky numër është rritur me 52.8 për qind, krahasuar me prill 2022. Gjatë katër-mujorit të parë 2023, numri i shtetasve të huaj që kanë hyrë në territorin shqiptar është 1.68 milionë. Ky numër është rritur me 57 për qind, krahasuar me të njëjtën periudhë të vitit 2022”, vlerëson INSTAT.

Numri i shtetasve të huaj që kanë vizituar Shqipërinë gjatë muajit prill është dyfishuar krahasuar me të njëjtën periudhë të një viti më parë.

Hyrjet në total të shtetasve shqiptar dhe të huaj në territorin shqiptar në muajin prill 2023 janë 1.16 milionë, një rritje prej 39.5 për qind krahasuar me prill 2022.

Tashmë në zonën e Durrësit raportohet se kanë mbërritur turistët e parë nga vendet e Evropës qendrore ku dominojnë polakët. Këta të fundit janë grupi i turistëve të organizuar me rritje të ndjeshme të kontratave me garanci me strukturat akomoduese në vend.

Por cilët janë turistët apo rajonet nga kanë ardhur këta të fundit në muajt e parë të vitit.

“Në prill 2023, rajoni me numrin më të lartë të hyrjeve të shtetasve të huaj në Shqipëri është rajoni i Evropës me 590.603 shtetas, pasuar nga Amerika dhe Azia Lindore / Paqësori, përkatësisht me 14.012 dhe 4.913 shtetas” thuhet në publikimin e INSTAT.