Shkup, 15 gusht – Grupi punues në Ministrinë e Drejtësisë do të caktojë takim këto ditë për të diskutuar për Ligjin e ri për shoqata dhe fondacione, informojnë për MIA-n nga Ministria e Drejtësisë. Ligji ekzistues është miratuar në vitin 2016 dhe zbatimi i tij në praktikë ka treguar disa dobësi, vlerësojnë nga Ministria.
Siç theksojnë ata, Ministria e Drejtësisë nuk ka marrë kërkesë për mendim pozitiv për miratimin e emrit të shoqatave “Car Borisi i Tretë” dhe “Car Ferdinand”.
Në prill të këtij viti në Manastir u hap Qendra e Kulturës “Vanço Mihailov”, më pas në Ohër u regjistrua Shoqata “Car Borisi i Tretë” dhe shpërndahet informacioni se edhe në Bogdanci po përgatitet një shoqatë e re bullgare, e cila sipas njoftimeve duhet të mbajë emrin e Car Ferdinandit, babai i Car Borisit të III.
Komuniteti hebraik dhe Fondi i Holokaustit të Hebrenjve të Maqedonisë ditë më parë njoftuan se me regjistrimin e shoqatës “Car Borisi i Tretë” në vendin tonë po glorifikohet nazizmi dhe fashizmi dhe po përhapet gjuha e urrejtjes.
Ministria e Drejtësisë bën me dije se grupi punues do të shqyrtojë analizën dhe do të përgatisë draft versionin fillestar të Ligjit të ri për Shoqatat dhe Fondacionet. Në të njëjtën kohë, do të shqyrtohen të gjitha pyetjet e hapura në lidhje me figurat historike.
Deri më tani nuk është mbajtur asnjë qëndrim në lidhje me vendosjen e regjistrit, por pritet që kjo çështje të shqyrtohet në periudhën e ardhshme.
“Qëllimi i këtyre ndryshimeve në ligj është përmirësimi i kuadrit ligjor në pjesën e dispozitave që kanë të bëjnë me statusin e organizatës me interes publik, regjistrimin e organizatave civile, përcaktimin e statusit të organizatave jofitimprurëse si dhe mënyrën e financimit të tyre. Kuadri ligjor ekzistues, duke iu referuar me kujdes jurisprudencës së Gjykatës Evropiane për të Drejtat e Njeriut, mjafton për institucionet kompetente, nëse vihet në dyshim emri i organizatës me një figurë të caktuar historike të diskutueshme, të monitorojnë dhe vlerësojnë në thelb programin dhe veprimet e organizatës dhe anëtarëve të saj përpara se të marrin ndonjë vendim për ndalimin e regjistrimit ose ndalimin e veprimit”, thekson Ministria e Drejtësisë.
Në legjislacionin tonë, liria e asociimit është një e drejtë e garantuar me Kushtetutë (neni 20 paragrafi 1 i Kushtetutës) dhe realizohet nëpërmjet themelimit të shoqatave, fondacioneve dhe subjekteve të tjera.
