Gërxhani: Askush s’e vret mendjen kush do t’i presë turistët në Shqipëri

Ines Nurja, ish-drejtore e përgjithshme e Institutit të Statistikave, ngriti në A2 Business shqetësimin e mungesës së punonjësve, veçanërisht në sektorin e turizimit.

Ajo theksoi se turizmi ka nevojë për një investim më afatgjatë. “Mungojnë punonjësit e kualifikuar dhe të pakualifikuar. Ka filluar të ndjehet mungesa e të rinjve dhe do të ndjehet edhe më shumë në vitet në vijim. Masat duhet të ishim marrë shumë më përpara që të mos kishim arritur në këtë gjendje që jemi tani. Turizmi është një nga pjesët kryesore të ekonomisë shqiptare”.

Ndërkohë, Kliton Gërxhani, kryetar i Shoqatës së Tur-Operatorëve, tha se numrat e turistëve janë rritur, por askush nuk e vret mendjen se kush do t’i presë ata.

“Ne nuk duhet të jemi tërë kohës në emergjencë. Nëse ne do të shkojmë nga një zgjidhje e shpejtë, si ajo me studentët, ne jemi në moment dëshpërimi. Ne jemi aktorë të këtij sektori dhe ajo që i mungon kësaj sfide madhore, është që ne nuk po mblidhemi me të gjithë aktorët përkatës, jo vetëm shtetin, që të mbyllet zinxhiri e të arrijmë një konkluzion se çfarë mund të bëjmë. Numrat e turistëve i kemi rritur, por askush nuk e vret mendjen se kush do t’i presë ata”, tha Gërxhani.