Aziri: BDI ka gënjyer, nuk është kërkuar asnjë hetim për rastet e montuara

Shkup, 29 prill – Deputeti i Aleancës për Shqiptarët, Elmi Aziri, sot përmes një konference për media, u shpreh se BDI deri tani ka mashtruar qytetarët e vendit se kinse kanë kërkuar hetime ndërkombëtare për rastet e montuara gjyqësore, informon Zhurnal.

Siç shprehet Aziri, ka qenë pikërisht Ali Ahmeti ai që ka potencuar se ka kërkuar ndihmë nga CIA dhe FBI për rastin e Kumanovës.

Sipas tij, ligjerisht këto kërkesa i parashtron ministria e drejtësisë. ASH ka kërkuar nga Ministri i drejtësisë përgjigje nëse ka ndodhur një gjë e tillë, por përgjigja nga Tupançevski ka qenë negative, gjegjësisht nuk është dërguar asnjë kërkesë e tillë.

“Përfundimisht demasokohet manipulimi që kryetari i BDI-së, Ali Ahmeti dhe zyrtarët e tjerë të kësaj partie kanë bërë, në lidhje me gjoja hetimin ndërkombëtarë të rasteve të montuara gjyqsore, gjatë qeverisjes së kësaj partie, herë me VMRO-në dhe herë me LSDM-në.

Në një paraqitje televizive, kryetari i BDI-së, Ali Ahmeti pati deklaruar se ka kërkuar nga SHBA-të, që CIA dhe FBI të përfshihen në hetimin e rastin e 9-10 majit në Kumanovë. Ahmeti dhe eksponentë të BDI-së në vazhdimësi kanë dhënë deklarata të tilla për rastet e dyshimta si të montuara politike.

Ligjërisht, kërkesat për hetim ndërkombëtar të proceseve gjyqsore i parashtron ministria e drejtësisë. Andaj, në seancën e fundit për pyetje të deputetëve, deputeti i Aleancës për Shqiptarët, Elmi Aziri, pyeti drejtëpërdrejtë ministrin e drejtësisë nëse kjo ministri ka dërguar ndonjë kërkesë të këtillë për cilindo rast, siç kishin deklaruar zyrtarët e BDI-së. Ministri i drejtësisë në mëny taksative tha se kërkesa të tilla nuk janë lëshuar nga kjo ministri”, ka thënë Aziri.