Në samitin me liderët afrikanë që po mbahet këto ditë në Uashington, SHBA-ja paralajmëroi se Kina dhe Rusia po e destabilizojnë Afrikën me rritjen e ndikimin e tyre, kërkuan lidhje më të forta tregtare me vendet e këtij kontinentit dhe ftuan disa për të marrë pjesë në pushtimin e Hënës dhe Planetit Mars.
Në samitin treditor, tubim i parë i tillë pas shtatë viteve, marrin pjesë nga 49 liderë afrikanë, të cilëve SHBA-j u ka premtuar miliarda ndihmë për vendet e tyre, para së gjithash për zhvillim ekonomik dhe luftën kundër korrupsionit, dhe Kovid-19, ndërsa në përpjekje të presidentit Xho Bajdenit që ta përdorë diplomacinë personale për kthimin e ndikimit të Uashingtonit në këtë kontinent.
Ministri i Mbrojtjes Lojd Ostin, mbrëmë u shfaq në një panel me disa liderë afrikanë, duke thënë se kundërshtarët e SHBA-së po përdorin metoda të ndyra. Sipas tij, Kina po e zgjeron praninë e saj në Afrikë “në baza ditore”, përmes rritjes së ndikimit ekonomik.
“Jemi të shqetësuar se ata nuk janë gjithmonë transparentë në atë që e bëjnë dhe kjo krijon probleme, të cilat përfundimisht do të kontribuojnë në destabilizimin, nëse tashmë edhe nuk kanë kontribuar”, tha Ostini.
Shefi i Pentagonit tha se Rusia “vazhdon të imponojë armë të lira” dhe vendos “mëditës në të gjithë kontinentin”, duke theksuar se edhe “kjo e destabilizon situatën”.
Administrata e Bajdenit planifikon të ndajë për Afrikën 55 miliardë dollarë gjatë tre viteve, duke përfshirë edhe për financimin e mjekëve afrikanë në kontekstin e luftës kundër Kovid-19.
Në samit mori pjesë edhe Agjencia Kombëtare e Aeronautikës dhe Hapësirës (NASA). Dy vende, Ruanda dhe Nigeria, janë bërë vendet e para afrikane që nënshkruan Traktatin Artemis, një projekt hapësinor i udhëhequr nga SHBA-ja për bashkëpunim ndërkombëtar për fluturime dhe stacionim të bazave në Hënë dhe Mars.
Në tubim sot është planifikuar të flasë presidenti Bajden, me një deklaratë se SHBA-ja mbështet pranimin zyrtar të Unionit Afrikan në G-20.
