Çmimet e naftës sot në tregjet ndërkombëtare u rritën për më shumë se dy dollarë për fuçi, duke vazhduar rritjen për të dytën ditë radhazi për shkak të reduktimit të furnizimit të naftës së papërpunuar dhe rritjes së kërkesës për benzinë në SHBA.
Çmimi i një fuçie nafte në tregun e Londrës u rrit për 2,09 dollarë në 108,71 dollarë, pasi dje u shtrenjtuan për 2,22 dollarë.
Në tregun amerikan çmimi i një fuçie është rritur për 2.36 dollarë, në 99.62 dollarë, pas rritjes së djeshme prej 2.28 dollarë.
“Rritja e djeshme në bursat botërore, pas rritjes së normave të interesit nga Banka qendrore amerikane FED dhe dobësimit të kursit të dollarit, ruajtën çmimin e naftës. Këtë e tregojnë edhe të dhënat zyrtare javore të qeverisë amerikane për rezervat e karburantit, deklaroi Tamas Varga nga PVM Oil Associates.
Furnizimet e naftës së papërpunuar në SHBA ranë me 4.5 milionë për fuçi javën e kaluar, ndërsa kërkesa për benzinë në SHBA u rrit 8.5 për qind, tregojnë të dhënat e qeverisë amerikane. Në një raport të posaçëm, Organizata e vendeve eksportuese të naftës (OPEK) sot njoftoi se një fuçi e shportës së naftës së anëtarëve të saja dje ka arrit në 108,11 dollarë, që do të thotë se është dobësuar për 1,25 dollarë në krahasim me një ditë më parë.
