Forcat ruse po vazhdojnë të “shtojnë ferrin e vërtetë” në rajonin lindor të Ukrainës, ka thënë guvernatori i Luhanskut. Ai u bëri thirrje njerëzve në zonat e pushtuara nga Rusia në jug, që të evakuohen “me të gjitha mjetet e mundshme”.
Ai tha se Rusia kishte nisur mbi 20 sulme artilerie, mortajash dhe raketash në provincë gjatë natës dhe forcat e saj po bënin presion drejt kufirit me Donetskun fqinj. Javën e kaluar, Rusia pushtoi bastionin e fundit të madh të rezistencës ukrainase në Luhansk.
Analistët parashikuan se trupat e Moskës ka të ngjarë të marrin kohë për t’u riarmatosur dhe rigrupuar. Por “deri më tani, nuk ka pasur asnjë pauzë operacionale të shpallur nga armiku”, tha Haidai.
Ndërkohë presidenti amerikan Joe Biden nënshkroi një paketë të re armësh për Ukrainën në vlerë deri në 400 milionë dollarë, duke përfshirë katër sisteme shtesë raketash artilerie me lëvizshmëri të lartë dhe më shumë municione.
