Së paku shtatë civilë afganë, përfshirë fëmijë, janë vrarë në sulmet ajrore të forcave pakistaneze dhe granatimet e artilerisë përgjatë kufirit Afganistan-Pakistan, kumtuan sot autoritetet vendase afganë.
Sulmet ndodhën gjatë natës në provincat lindore afgane Kunar dhe Host.
Në Kunar, forcat pakistaneze me artileri të rëndë i bombarduan rajonet Marvara, Shelton dhe Nari në tre ditët e fundit, tha për DPA kreu provincial i departamentit të informacionit dhe kulturës të talebanëve, Naxhibullah Hanif.
Gjithsej pesë civilë, duke përfshirë fëmijë, u vranë dhe një u plagos gjatë natës, tha ai.
Në Host, një zyrtar tjetër taleban, i cili nuk dëshiroi të emërohet, tha se forcat ajrore pakistaneze kishin bombarduar katër fshatra në zonën Sperah gjatë natës, ku e humbën jetën të paktën dy civilë.
Raporte të tjera tregojnë numrin e të vdekurve në sulmet ajrore.
Islamabad nuk ka konfirmuar se i ka kryer sulmet.
