Shkup, 8 prill – Kryeministri i Republikës së Maqedonisë së Veriut, Dimitar Kovaçevski së bashku me ministrin e Financave, Fatmir Besimi në margjina të Forumit ekonomik Delfi në Greqi, takuan ish-kryeministrin britanik Toni Bler, me të cilin diskutuan për situatën aktuale në botë dhe sfidat me të cilat përballen vendet si pasojë e agresionit ushtarak të Rusisë kundër Ukrainës, kriza energjetike dhe masat që ndërmerren për stabilitet në furnizimin me energji dhe parandalimin e goditjeve të çmimeve.
Në këtë drejtim, u prezantuan mundësitë e Institutit për ndryshime globale të kryesuar nga Bler, në mënyrë që të mbështesë zhvillimin teknologjik të vendeve që kanë ambicie për të qenë konkurruese për të qenë në hap me vendet e avancuara teknologjikisht, si një mënyrë për të kapërcyer sfidat aktuale.
Kovaçevski dhe Bler diskutuan edhe për rëndësinë e zhvillimit ekonomik të vendeve të Ballkanit Perëndimor, si dhe për nismën “Ballkani i Hapur”, e cila është me rëndësi të madhe për përparimin e vendeve nismëtare. U konstatua se digjitalizimi i përshpejtuar dhe progresi teknologjik janë shumë të rëndësishëm për arritjen e qëllimeve të nismës.
Kryetari i Qeverisë Kovaçevski dhe ish-kryeministri britanik Bler shprehën kënaqësinë për marrëdhëniet e shkëlqyera bilaterale ndërmjet Republikës së Maqedonisë së Veriut dhe Mbretërisë së Bashkuar, për të cilat shprehën besimin se kanë potencial për t’u thelluar.
