Shkup, 8 prill – Kryetari i Qeverisë së Republikës së Maqedonisë së Veriut, Dimitar Kovaçevski kryeson delegacionin qeveritar në Forumin e shtatë Ekonomik Delfi në Greqi.
Në Forumin Ekonomik Delfi, kryeministri Kovaçevski sot do të zhvillojë takime pune me zëvendës ndihmës Sekretarin e Shtetit të SHBA-së për Çështjet Evropiane dhe Euroaziatike dhe përfaqësuesin special për Ballkanin Perëndimor Gabriel Eskobar, përfaqësuesin special të BE-së për dialogun Beograd-Prishtinë dhe Ballkanin Perëndimor , Miroslav Lajçak, si dhe me homologun kosovar Albin Kurti, njoftoi pres-shërbimi qeveritar.
Gjithashtu, janë planifikuar takime me ish-kryeministrin britanik Toni Bler dhe me ish-kryeministrin e Greqisë dhe liderin e “Syriza”, Aleksis Cipras.
Në Forum janë Të pranishëm edhe kryeministrat e Bullgarisë, Bosnjë-Hercegovinës, Kosovës dhe Malit të Zi, gjë që këtë vit parasheh një seksion të veçantë kushtuar Ballkanit Perëndimor. Afro 800 folës nga mbi 36 vende u konfirmuan në Forumin e shtatë Ekonomik Delfi, të titulluar “Realitete të reja”. Janë përfshirë një sërë temash, si siguria botërore, ekonomia globale, ndryshimet klimatike, e ardhmja e BE-së, teknologjia, shëndetësia, shoqëria dhe kultura.
