IPK publikon dy raporte të inspektimit për administrimin e patentë shoferëve të konfiskuar dhe parave të imëta në Polici
Inspektorati Policor i Kosovës, respektivisht Departamenti i Inspektimeve ka publikuar paportet e inspektimeve të rregullta në fushën “Administrimi i patentë shoferëve të konfiskuar” dhe “Administrimi i parave të imëta në Policinë e Kosovës”.
Bazuar në Planin Vjetor të Inspektimeve të Rregullta (2022) është iniciuar inspektim për të vlerësuar performancën policore në administrimin e patentë shoferëve të konfiskuar në trafikun rrugor.
Siç bëhet e ditur inspektimi është përqendruar në tetë (8) stacione policore të kategorisë A në kuadër të Divizionit të Sigurisë Publike të Departamentit për Operacione.
“Inicimi i inspektimit është ndikuar nga nevoja që të vlerësohet respektimi i rregullave të trafikut në marrjen (konfiskimin) e patentë shoferëve dhe aplikimit të masave mbrojtëse dhe pikëve negative”, thuhet në raport.
Po ashtu, theksohet se gjetjet e këtij inspektimi janë me interes për zyrtarët policor në nivel lokal, si dhe nivelin mbikëqyrës dhe vendimmarrës në stacione policore.
IPK në kuadër të Raportit të inspektimit ka dhënë tre (3) rekomandime për Policinë e Kosovës që kanë të bëjnë me eliminimin e paqartësive rreth marrjes apo konfiskimit të patentë shoferëve me rastin e rishikimit të legjislacionit sekondar nga fusha e trafikut, shtimin e kontrollit mbi evidencat e plota të kundërvajtjeve, ndalimin e praktikave aktuale të konfiskimit të patentë shoferëve me rastin e shqiptimit të gjobave që lidhen me zbatimin e Ligjit për parandalimin dhe luftimin e pandemisë Covid – 19, etj.
Inspektimi tjetër është realizuar për të vlerësuar performancën policore në administrimin e parave të imëta.
Inspektimi është përqendruar në Drejtorinë për Buxhet dhe Financa në kuadër të Departamentit për Shërbime Mbështetëse. Inicimi i inspektimit është ndikuar nga nevoja që Policia të sigurohet se fondet publike shpenzohen në mënyrë të drejtë, racionale dhe ekonomike, për të mbuluar kërkesat e ligjshme të saj. Inspektimi ka ofruar një mundësi për të vlerësuar edhe llogaridhënien dhe profesionalizmin e strukturës përkatëse policore në menaxhimin e fondeve publike.
