Vihet në pikëpyetje fillimi i VITIT SHKOLLOR (VIDEO)

/

Vihet në pikëpyetje fillimi i vitit të ri shkollor më 1 shtator. Sipas informacioneve që ka siguruar Alsat, kjo ndodhë për shkak të mosmarrëveshjeve brenda në Qeveri dhe Komisionin e Sëmundjeve Ngjitëse. Madje, edhe mbledhja e Komisionit dhe grupit të punës nga Ministria e Arsimit sot u anulua. Pavarësisht se ditë më parë në Shtabin e Krizës kishte mbizotëruar qëndrimi që viti i ri shkollor të fillojë me prezencë fizike tashmë thuajse çdo gjë ka ndryshuar. Jozyrtarisht, Alsat mëson se ministra të caktuar janë shprehur kundër fillimit të vitit shkollor me prezencë fizike për shkak të gjendjes më virusin korona.  Për këtë çështje sot diskutoi edhe Komisioni për Arsim pranë BNJVL-se. U miratuan disa konkluzione, mes të cilave të rriten bllok dotacionet si dhe çdo komunë bashkë më institucionet arsimore t’i përshtatet modeleve të caktuara nga Ministria e Arsimit

 “Qëndrimi im personal është se është te rëndësishme të kemi mundësi për prezencë fizike të nxënësve sepse problemi nuk është i njëanshëm. Të gjithë e pamë atë që ndodhi vetë me mësimin online, cilat ishin pasojat. Por, jo me çdo kusht të zbatohet sepse shëndeti është para të gjithave. Prandaj edhe flasim për zgjedhje fleksibile të modeleve, kombinime varësisht gjendjes epidemiologjike në mjedise të caktuara- deklaroi Natasha Petrovska, kryetare e Komisionit për arsim pranë BNJVL-së.

 Ndërkohë, të anketuar nga Alsat një pjesë e prindërve shprehen pro mësimit më prezencë fizike sepse mësimi nga distanca ishte jo efikas.

“Nëse gjitha kafenetë janë duke punuar dhe sendet normal janë duke funksionuar pse mos të funksionojnë  edhe shkollat, normal me protokollet e shtetit për mbrojtje”

“ Varfëri është te ne, nuk kanë telefona, si do të komunikoj me arsimtarin ose profesorin”.

 “Sa ishit të kënaqur me zhvillimin e mësimit online? Aspak nuk kemi qenë të kënaqur, prandaj duhet me rregull”.

  “Më mirë do të kishte qenë në shkollë, ndryshe është kur dëgjon mësimin direkt nga mësuesi.”.

Kthimin në shkollë e kërkojnë edhe vet fëmijët të cilët thonë se tashmë ndjejnë mall për shkollën dhe shoqërinë.

  “Unë i kam nëntë vjet edhe shumë më ka marrë malli për shkollën. Më mungojnë shokët, mësuesja, shoqet”

Prindërit përmes një peticioni në internet, i cili është nënshkruar deri më tani nga 2000 vetë, kërkojnë që viti shkollor nga 1 shtatori të zhvillohet me mësim në distancë. Peticioni kërkon që mësimi në distancë të vlej për të gjithë nxënësit dhe veçanërisht të përfshijë fëmijët nga klasa e parë deri në të pestën, duke pasur parasysh moshën dhe paaftësinë për t’u pajtuar në mënyrë të pavarur me protokollet shëndetësore.

/Alsat-M/