Category archive

Formula 1 - page 3

Hamilton-Mercedes, triumf në Bahreinin e pretendimeve të mëdha nga Ferrari

në kategorine Formula 1/Sport

Lewis Hamilton befason të gjithë, për më tepër tifozët e Ferrarit në garën e tyre të preferuar të Bahreinit, duke triumfuar kështu në Çmimin e Madh të vendint të gjirit, falë edhe gabimeve dhe fatit të keq të Vettel dhe Leclerc.

Dy pilotët e “kokëkuqes” italiane e nisën garën e Bahreinit në dy vendet e para, me Leclerc në krye, i cili u parakalua që në nisje nga gjermani 4 herë kampion i botës, Vettel, por rokada e vendeve nuk do të vononte.

Vettel do të ndëshkohej nga një gabim i tij, i gjendur nën presionin e Hamiltonit, teksa pasi dëmtoi njëvendëshen e tij u detyrua të bënte ndalesën e tretë në “pit stop”. Kjo ndalesë e paparashikuar nuk e lejoi të ngjitej më shumë sesa vendi i pestë në përfundim të garës.

Hamilton përfitoi gjithashtu nga fati i keq i Leclerc, i cili edhe pse gjenden në kryesim të garës, i pashqetësuar, pësoi një defekt në motor që i ngadalësoi ritmin dhe e detyroi të dorëzonte frerët e garës kur kishin mbetur 12 xhiro nga fundi.

Talenti i ri i Ferrarit e mbylli në vendin më të ulët të podiumit, pasi u parakalua edhe nga finlandezi i Mercedesit, Bottas, ndërsa i shpëtoi për mrekulli sulmit të Verstappenit.


Top Channel

Burimi: http://top-channel.tv/

Hamilton fiton në Bahrein

në kategorine Formula 1/Sport

Lewis Hamilton ka fituar Çmimin e Madh të Bahrein në Formula 1, falë një paraqitje perfekte, por edhe falë gabimeve të rivalëve.  Anglezi ka parakaluar Sebastian Vettel në xhiron e 37-të, duke e detyruar gjermanin të bëjë një gabim dhe ta mbyllë garën në vendin e 4-t.  Më pas, anglezi ka arritur të marrë vendin e parë pasi ka parakaluar edhe yllin e ri të Ferrari-t, Leclerc, i cili ka kryesuar deri në xhiron e 48-të.  

Një parakalim ky që ka ardhur për shkak të problemeve me motorin të plotit 21-vjeçar, i cili është parakaluar edhe nga Bottas, që ka zënën vendin e dytë.  Renditja e pilotëve vazhdon të kryesohet nga Bottas, i cili ka 26 pikë. Pas tij renditet Hamilton me 18, i ndjekur nga Verstappen me 15.

Burimi: http://www.botasot.info/

F1, Leclerc “zgjon” Ferrarin me një “pole position” historik

në kategorine Formula 1/Sport

Charles Leclerc përjetoi një ditë historike në Formula 1.

Piloti i ri i Ferrarit fitoi “pole position”-in e tij të parë në karrierë në pistën e Bahreinit, teksa e përshkoi atë me një kohë rekord: 1 minutë, 27 sekonda e 866 të mijëtat, duke bërë që në Maranello të shpërthejë festa dhe t’i gëzohen një piloti vërtet premtues.

Te Ferrari u paraqit mjaft mirë edhe Sebastian Vettel, i cili u rendit në vendin e dytë, me rreth 3 të dhjetat më shumë se Leclerc, duke bërë që “Kokëkuqja” italiane të konfirmojë formën e shkëlqyer të shfaqur edhe gjatë provave të lira.

Menjëherë pas makinave Ferrari, në vendin e tretë u pozicionua Lewis Hamilton me Mercedes, i ndjekur nga Valtteri Bottas në vendin e katërt, duke lënë pas Max Verstappen.

Ata që zhgënjyen në këto prova ishin Ricciardo e Gasly, që u eliminuan që në minisesionin e dytë, ndërkohë që vazhdon të ketë probleme Williams, e renditur në vendet e fundit me Rusell e Kubica.

Burimi: http://www.botasot.info/

Djali i Schumacher në gjurmët e të atit/ Debuton në F2, gati testi me Ferrarin

në kategorine Formula 1/Sport

Mick Schumacher po ndjek gjurmët e babait të tij, Michael. Pas debutimit në garat e F2 në Bahrein, ku e mbylli garën i teti, ai po përgatitet për testin e parë në Formula 1 me Ferrarin .

Këtë fundjavë, Mick Schumacher debutoi në F2 në Bahrain, por ky nuk është lajmi i madh në karrierën e djalit të legjendarit, Michael Schumacher.

Ai do të testohet të martën në një makinë të Formula 1, pikërisht me “kokëkuqen”, ku fama e të atit arriti kulmin.

Mick Schumacher u shpall kampion në Formula 3 para se të kalonte në Formula 2, e tashmë do të bëjë hapin e tij të madh, në gjurmët e babait të tij legjendar, Michael Schumacher.

Të shumtë janë ata që po presin me padurim të shohin për herë të parë djalin e idhullit të tyre nën njëvendëshen e kuqe.

“Jam më shumë se i emocionuar dhe do të doja të falënderoja Ferrarin dhe Alfa Romeon për dhënien e kësaj mundësi”, tha Mick, të premten.



Top Channel

Burimi: http://top-channel.tv/

Vettel: Sakhir pistë ku çdo xhiro ndryshon nga tjetra, ja arsyeja

në kategorine Formula 1/Sport

Gara e dytë e Botërorit 2019 të Formula 1 do të jetë ajo e Çmimit të Madh të Bahrein, që zhvillohet më 31 mars, në pistën e Sakhir. Për Ferrarin ky është një shans i mirë për t’u rikthyer te fitorja, pas zhgënjimit në garën e parë, në Australi, ku nuk arriti të ngjitet as në podium.

“Është një pistë që asnjëherë nuk është e pastër, për shkak të rërës që ngrihet nga era. Kjo bën që çdo xhiro të jetë ndryshe nga tjetra dhe kjo mund të bëjë diferencën, sidomos në provat zyrtare”, tha Vettel.

“Mjafton të mos jesh në trajektoren ideale edhe për disa centimetra dhe rrezikon të gjesh makinën në një zonë të papastër dhe gomat xhirojnë, duke humbur shumë kohë. Këtu, çdo gabim paguhet shtrenjtë”, u shpreh më tej Vettel, i katërti në Australi, dy javë më parë.

“Sezoni sapo ka nisur, por çdo garë ka rëndësi, pasi secila jep pikë për titull. Këtu në Bahrein do të kuptojmë nëse i realizuam korrigjimet, pas dështimit në Australi, ku nuk e shfrytëzuam në maksimum potencialin e makinës tonë”, tha Sebastian Vettel.

Burimi: http://www.botasot.info/

Mercedes: Në Bahrein do të luajmë rolin e sfidantit

në kategorine Formula 1/Sport

Në Australi, gara e parë sezonale e Botërorit 2019 në Formula 1, u mbyll me një triumf të dyfishtë të Mercedes. Bottas e Hamilton zunë dy vendet e para dhe finlandezi realizoi xhiron më të shpejtë. Pavarësisht kësaj, Toto Wolff, shefi i Mercedes, mendon se gara e radhës, në Bahrein, nuk e sheh aspak makinën gjermane si favorite.

“Sezoni sapo ka nisur, Ferrari do të bëjë gjithçka për të fituar në Bahrein dhe Red Bull tregoi se mund të duelojë për fitore. Ne e pamë forcën e “kokëkuqes” gjatë testeve dhe pavarësisht paraqitjes së mirë në Australi, në Bahrein nuk jemi favoritë. Një garë e vetme nuk vendos fatin e gjithë sezonit”, tha Wolff.

Ashtu si Australia edhe Bahrein ëhstë një pistë mikse, mes një gare qytetase dhe një piste tradicionale. Gara në shkretëtirë ka shumë të papritura, që vijnë kjryesisht nga orari i garës dhe ku temperaturat ndryshojnë shpejt. “Është një histori më vete, ku temperatura ndryshon nga njëri session në tjetrin. Ky është faktor i rëndësishëm, që të pengon për të patur një makinë të qëndrueshme”, tha Wolff.

Burimi: http://www.botasot.info/

Alonso, pas dy javësh sërish në pistën e Formula 1 me McLaren

në kategorine Formula 1/Sport

Fernando Alonso pritet të testojë makinën McLaren më datat 2-3 prill, në pistën e Bahrein, pas garës së Çmimit të Madh të Bahrein, që do të zhvillohet aty më 31 mars. Sipas të përditshmes “Autosport”, piloti spanjoll do të provojë makinën e re McLaren, që këtë sezon përdor motorin Renault.

Për momentin ky test do të shërbejë vetëm përë të kuptuar se ku duhet punuar, në mënyrë që makina britanike të jetë sa më e shpejtë në të ardhmen. Gjithsesi, ky test konsiderohet edhe si një hap i parë i njohjes së spanjollit me njëvendëshen e re, të cilën mund ta pilotojë sërish vitin 2020.

Pavarësisht se u largua nga McLaren dhe Formula 1 në fund të sezonit të kaluar, Alonso ka ende një marrëveshje me makinën britanike, duke qenë ambasador i saj. Këtë sezon, spanjolli garon në Botërorin e Endurance, ku ka fituar 3 nga 6 garat e zhvilluara deri më tani dhe kryeson renditjen.

Problem është se më 3 prill Alonso duhet të testojë edhe makinën e tij Toyota, në prag të garës së SPA (Belgjikë) e vlefshme për Botërorin e Endurance. Në rast se nuk arrin të provojë makinën McLaren në Bahrein, spanjolli ka ende një shans të dytë në testet që do të kryhen në gusht, pas garës së Hungarisë.

Burimi: http://www.botasot.info/

Kryeqyteti i Vietnamit, Hanoi nis përgatitjet për të pritur F1-shin në vitin 2020

në kategorine Formula 1/Sport

Vietnami nis përgatitjet për të pritur një garë të Formulës 1, duke filluar që nga viti i ardhshëm. Në kryeqytetin e vendit, Hanoi, u zhvillua ceremonia e nisjes së këtyre përgatitjeve, ku i pranishëm ishte edhe presidenti i Federatës Ndërkombëtare të Automobilizmit, Jean Todt.

Ky i fundit deklaroi se Çmimi i Madh i Vietnamit është një mundësi e shkëlqyer për t’u hapur dyert personave të apasionuar pas motorsportit në Azinë Juglindore, e se shpreson që ky turne të sjellë edhe një brez të ri të pilotëve vietnamezë në Formulën 1.

Pista e Hanoit, ku do të zhvillohet Çmimi i Madh i Vietnamit, do të jetë 5.6 km dhe në të do të përfshihen edhe pjesë rrugësh në “My Dinh”, një zonë kjo që është pranë stadiumit kombëtar dhe 13 km larg qendrës së Hanoit.

Organizatorët deklaruan se refuzuan që të zhvillonin këtë garë në zonën historike “Old Quarter” të Hanoit, për shkak të logjistikës dhe kostove shumë të larta. Organizatorët vietnamezë kanë nënshkruar një kontratë 10-vjeçare me drejtuesit e Formulës 1, e sipas medias, kjo garë pritet të ketë një kosto prej 60 milionë dollarësh në vit.


Top Channel

Burimi: http://top-channel.tv/

Botërori i Formulës 1 starton me dominimin e Mercedes, Hamilton niset i pari

në kategorine Formula 1/Sport

Botërori i Formula 1 nisi me dominimin e Mercedes. Në pistën e Melbournit, dy pilotët e skuderisë kampione të botës, Lewis Hamilton dhe Valtteri Bottas pushtuan vijën e parë të startit të garës, që do të zhvillohet të dielën pasi regjistruan kohët më të shpejta nga këto kualifikuese.

Hamilton, kampioni në fuqi i botës, e përshkoi pistën australiane në këto prova me kohën 1 minutë 20 sekonda e 486 të mijtat duke fituar pole positionin e 84 në karrierë dhe të 6 radhazi në Melbourne. I vetmi që i hapi probleme britanikut, ishte pikërisht shoku i tij i skuadrës, Valteri Bottas që ishte vetëm 112 të mijtat larg tij.

Pas finlandezit, në vendin e tretë u rendit piloti i Ferrarit, Sebastian Vettel me 702 të mijtat më shumë se Hamilton, i ndjekur në të katërtin nga Max verstappen i Red Bull me holandezin që vetëm në çastet e fundit la pas Leclerc duke i rrëmbyer vendin në vijën e dytë të startit.

Një paraqitje shumë të mirë në këto prova bënë dy pilotët e Skuadrës Haas, Grosjean e Magnussen që u pozicionuan në vendin e 6 dhe të 7. Në dhjetëshen e pilotëve më të mirë të kualifikueseve ishin edhe Kimi Raikkonen me Alfa Romeo dhe Perez me Racing Point, ndërkohë që pilotët e Renault Hulkenberg e Ricciardo i mbyllën provat zyrtare respektivisht në vendin e 11 dhe të 12.


Top Channel

Burimi: http://top-channel.tv/

Hamilton lë prapa Vettelin, siguron “pole” në Australi

në kategorine Formula 1/Sport

Lewis Hamilton ka siguruar “pole position” sot në pistën e Melburn, aty ku mëngjesin e së dielës do të zhvillohet garat e Cmimit të Madh të Australisë në Formula 1 (gara e parë sezonale). Piloti britanik i Mercedes dha kohën 1’20”486, duke qenë më i shpejti në pistë.

Ai la pas shokun e tij të skuadrës Valtteri Bottas me 1 të dhjetat më shumë. Pra, makina gjermane do ta nisë garën nga vija e parë e startit me të dy pilotët e saj.

Makina Mercedes konfirmoi kohët e shpejta të vendosura ditën e premte në dy sesionet e para të provave të lira, e pakapshme nga rivalët. As nga Sebastian Vettel me Ferrari, i treti sot në provat zyrtare, duke lënë pas Max Verstappen me Red Bull (i katërti). Ndërsa në vendin e pestë u rendit makina tjetër Ferrari, ajo e Charles Leclerc.

Image

Burimi: http://www.botasot.info/

Mercedes e nis aty ku e la

në kategorine Formula 1/Sport

Sezoni i ri nis sërish nën shenjën e Mercedes, me Lewis Hamilton që dominoi dy sesionet e provave të lira të Çmimit të Madh të Australisë, ndërkohë që zhgënjyen tërësisht dy makinat Ferrari. Piloti britanik ndali kronometrin në 1’22”600, duke lënë pas me 48 të mijëtat shokun e tij të skuadrës Valtteri Bottas. Paraqitje e mirë e makinës gjermane, që befasoi me kohët e dhëna në pistë, duke lënë pas rivalët.Në vijën e dytë të nisjes u renditën dy makinat Red Bull, me Max Verstappen që u klasifikua i treti, duke lënë pas shokun e tij të skuadrës Pierre Gasly. Zhgënjen makina Ferrari, që klasifikohet e pesta me Sebastian Vettel, pothuajse 9 të dhjetat e sekondës më e avashtë se Mercedes, ndërsa Leclerc me “kokëkuqen” tjetër u rendit në vendin e 9-të, me +1’1 (francezi pati probleme me njëvendëshen e tij në pistë).Provat e sotme treguan se Mercedes kishte ndryshuar shumë krahasuar me testet dimërore, ndërsa Ferrari nuk dha atë që pritej. Mirë u paraqit Kimi Raikkonen me Alfa Romeo, i gjashti, si dhe dy makinat Renault, që hynë në “top-10” vendet e para. Të shtunën në mëngjes do të zhvillohen provat zyrtare në Australi, ku do të garohet për “pole position”.

Burimi: http://www.botasot.info/

Gati për edicionin e ri

në kategorine Formula 1/Sport

Pilotët e Formula 1 thuajse kanë mbërritur të gjithë në Australi, aty ku ditën e diel do të zhvillohet gara e parë sezonale. Ky sezon konsiderohet si “i artë” për Ferrarin, ku dyshja Vettel-Leclerc është përzgjedhur për të rikthyer titullin kampion për konstruktorë. Në dy sezonet e fundit, në Australi ka triumfuar Vettel, që shpreson të bëjë të njëjtën gjë edhe këtë vit.

“Në këtë pistë, dy sezonet e fundit kemi kujtime të mira. Kemi fituar dhe kemi tregua se kjo është një pistë e favorshme për ne. Shpresoj që kjo gjë të ndodhë edhe këtë vit. Fitorja që në garën e parë të stimulon më shumë për të vijuar sezonin me më shumë optimizëm. Nuk ka për të qenë e lehtë, por jemi gati”, u shpreh Vettel.

Më tej, piloti gjerman, 4 herë kampioni i botës në Formula 1 shtoi: “Shpresoj që ky të jetë sezoni i duhur për titullin. Janë 21 gara, të gjitha të rëndësishme për titullin. Ta nisim me këmbën e mbarë dhe këmbën të mos e heqim për asnjë moment nga gazi, për të qenë të shpejtë dhe fitues në çdo garë. Tifozët e meritojnë titullin këtë sezon”.

Burimi: http://www.botasot.info/

Formula 1 “ndez” motorët në fundjavë, me një risi për xhiron më të shpejtë

në kategorine Formula 1/Sport

Në Formulën 1 është gjetur një mënyrë për të ndezur edhe më shumë garat e Botërorit të këtij viti.

Piloti që do të shënojë xhiron më të shpejtë gjatë garave do të fitojnë një pikë më shumë, por me kushtin që ai të jetë mes 10 pilotëve të parë në përfundim të garës.

Kjo ide është zyrtarizuar tashmë edhe nga Federata Ndërkombëtare e Automobilizmit (FIA) dhe do të aplikohet që nga kjo fundjavë në Melbourne, kur do të zhvillohet edhe gara e hapjes së këtij sezoni, ajo për Çmimin e Madh të Australisë.

Pika që do të jepet për pilotin me xhiron më të shpejtë vlen edhe për klasifikimin e konstruktorëve, që do të thotë se gjatë këtij sezoni do të jepen 21 pikë shtesë. Kjo nuk është hera e parë që aplikohet një rregull i tillë, pasi më herët është zbatuar edhe në Botërorin e Formulës 1 në periudhën 1950-1959.


Top Channel

Burimi: http://top-channel.tv/

Rossi: Lajmi i keq është se kjo situatë është prej muajsh

në kategorine Formula 1/Sport

Vendi i pestë në garën e parë sezonale në Katar konsiderohet si një rastësi nga piloti italian Valentino Rossi, që bëri një paraqitje të mirë në pistën e Losail. Ai e nisi garën nga vendi i 14-të, ndërsa shoku i tij i skuadrës, Maverick Vinales, që u nis nga “pole” u klasifikua i shtati. Ç’ka tregon se Yamaha nuk është ende e shpejtë dhe se më së shumti diferencën e bëri piloti se sa motori.

“Jam i kënaqur nga vendi i pestë, një rezultat pozitiv për mua. Për mua ishte një garë e bukur, pasi arrita një pozicion që nuk e mendoja para fillimit të garës. Duke parë se si shkuan gjërat ditën e shtunë vendi i pestë është si fitore. Gjithsesi, lajmi i keq është se kjo situatë është prej muajsh. Ç’ka do të thotë se jemi aty ku ishim edhe sezonin e kaluar”, tha Rossi.

“Në Losail patëm fat. Unë e bëra punën time, por motori Yamaha nuk është aty ku shpresoja para garës së parë. Kam frikë se në pista të tjera do të vuajmë më shumë se në Katar dhe do të dalim më dobët. Unë kam frikë nga gara jo nga xhiro e shpejtë, pasi e pamë se çfarë ndodhi me Vinales. Shpresoj që motori të ndryshojë deri në garën tjetër”, u shpreh Rossi.

Burimi: http://www.botasot.info/

Hamilton dhe Rossi shkëmbëjnë vendet në fund të sezonit

në kategorine Formula 1/Sport

Pilotët Lewis Hamilton dhe Valentino Rossi kanë vendosur të shkëmbëjnë vendet në fund të këtij sezoni. Kjo gjë dukej si një ëndërr pak kohë më parë, por sot dy pilotët e garave kanë vendosur të takohen dhe shkëmbejnë mjetet e garave. Hamilton do të pilotojë motorin Yamaha të Rossit, ndërsa piloti italian do të provojë makinën Mercedes të pilotit britanik.

Për Rossin ky është një rikthim në pistë me një makinë të Formula 1, pasi ka kryer disa teste me Ferrarin në vitet 2004-2010. Kjo është një dashuri e gjatë mes pilotit kampion të Moto GP dhe “kokëkuqes”, por që asnjëherë nuk u konkretizua. Ndërsa Hamilton gjithnjë ka shprehur pasionin që ka për motorët dhe këtë herë do të provojë një motor garash.

Ende nuk dihet se ku do të ndodhë ky shkëmbim i vendeve mes dy pilotëve, por gjasat janë që kjo të kryhet në dhjetor, pas garës së fundit të Botërorit 2019 të Formula 1. Pilotët pritet të takohen në pistën e “Yasa Marina”, në Abu Dhabi, pak ditë pasi të ketë përfunduar sezoni sportiv. Rossi e ka ftuar Hamilton që të kalojnë së bashku disa ditë në vilën e tij pranë Monza.

Burimi: http://www.botasot.info/

Ndryshon sistemi i pikëzimit në Formula 1

në kategorine Formula 1/Sport

Kur duhet edhe 10 ditë që të nisë Botërori 2019 në Formula 1 një revolucion i vogël  mund të prezantohet që në garën e parë, që zhvillohet më 17 mars në Australi. Në Melburn, pritet që të prezantohet rregullorja e re e pikëzimit, që synon të japë 1 pikë për pilotin që realizon xhiron më të shpejtë gjatë garës. Por me një kusht, që ky pilot të jetë mes 10 të parëve në atë garë, pra të klasifikohet në zonën e pikëve. Ky ndryshim i rregullores është miratuar pak ditë më parë në Këshillin Botëror të FIA-s, por që të hyjë zyrtarisht në fuqi duhet të miratohet edhe nga Komisioni Sportiv i Formula 1. Të gjithë anëtarët duhet të çojnë votën e tyre përmes një e-mail deri më datën 15 mars.

Burimi: http://www.botasot.info/

Marquez: Titulli kampion do të jetë i imi

në kategorine Formula 1/Sport

Kampioni i botës në Moto GP, spanjolli Marc Marquez, 4 ditë nga fillimi i sezonit 2019, ka deklaruar se objektivi i tij mbetet titulli kampion. Jo vetëm kaq, por spanjolli ka “kërcënuar” rivalët, duke thënë se edhe këtë vit askush nuk ka për ta zbritur nga froni.

“Honda ka bërë gjithçka për t’u përmirësuar dhe testet e konfirmuan këtë gjë. Unë kam rikuperuar nga operacioni në shpatull dhe me një motor të tillë askush nuk më ndal”, tha Marquez, 6 tituj kampionë në karrierën e tij në garat e motoçiklizmit.

“Kemi qenë të shpejtë në pistën e Losail, aty ku zakonisht vuajmë shumë. Ndaj jemi të sigurtë se edhe këtë vit do të shpallemi kampionë. Gara e parë do të jetë e rëndësishme, pasi temperaturat e pistës mund të ndikojnë në konsumin e gomave”, tha Marquez.

“Gara e parë është e rëndësishme, pasi duam ta nisim sezonin me një fitore dhe kjo ndikon psikologjikisht. Gjithsesi, edhe pse rivaliteti nuk do të mungojë titulli kampion do të jetë i imi, për këtë jam i sigurtë dhe i bindur”, u shpreh Marc Marquez.

Burimi: http://www.botasot.info/

Asnjëherë mes më të mirëve

në kategorine Formula 1/Sport

Asnjëherë mes më të mirëve, madje renditej në vendet e fundit çdo ditë që janë zhvilluar testet në pistën e Montmelo. Një situatë që ka alarmuar kampionin e botës në Formula 1, britanikun Lewis Hamilton, që e sheh se këtë sezon do ta ketë shumë të vështirë. “Në këto momente, Ferrari është më i shpejtë se Mercedes. Mund të pranoj se “kokëkuqja” aktualisht është gjysmë sekondi më e shpejtë se ne për xhiro”, tha Hamilton.

Megjithatë, piloti i Mercedes e merr me filozofi situatën: “Për fat, këto janë vetëm teste dhe nuk japin pikë për Botërorin. Gjëja më e rëndësishme është që të jemi të shpejtë të shtunën, në Melburn, në garën e parë sezonale. Unë besoj se mekanikët do të dinë të rikuperojnë këtë ngërç, për të qenë gati për sfidat e vërteta”, u shpreh britaniku, 5 herë kampion bote.

Gara e parë sezonale është më 17 mars, çka do të thotë se Mercedes ka ende kohë për të punuar e rikuperuar. Madje Hamilton mendon se përveç Ferrari edhe Red Bull e McLaren mund të duelojnë për titull. “Të gjitha skuadrat e kanë ulur diferencën me ne për sa i përket kohëve që japin në pistë. Kjo do të thotë që disa makina mund të bëjnë surprizën këtë sezon. Ky ka për të qenë viti më i bukur i Formula 1 i dekadës së fundit”, tha Hamilton.

Burimi: http://www.botasot.info/

Asnjë motor nuk bind për titullin

në kategorine Formula 1/Sport

Më 10 mars, në pistën e Losail, në Katar, do të zhvillohet gara e parë sezonale në Moto GP. Pas një paraqitje jo fort të mirë në testet e para, në Sepang, motori Honda dhe piloti spanjoll Marc Marquez ndryshuan ritëm, duke qenë protagonistë në testet e zhvilluara në Katar. Rezultatet e fundit kanë sjellë optimizmin e kampioni i botës në fuqi, që synon një tjetër titull.

“Jam gati për sezonin e ri. Këtë herë nuk kam dhimbje në shpatull dhe kam xhiruar më shumë në pistë. Kemi bërë jo një por disa hapa përpara. Nuk jemi ende 100%, por as të tjerët nuk janë. Katari është një pistë ku zakonisht duelojmë fort dhe paraqitemi mirë. Por ajo që shoh është se edhe të tjerët janë në të njëjtin nivel me ne”, tha Marquez.

“Këtë vit duket pak e çuditshme situata. Asnjë motor nuk është 100% gati dhe të gjithë janë gati për të dueluar për titullin sezonin e ri. Kjo e bën të paqartë situatën, pasi të gjithë duan ta nisin mirë sezonin e ri. Shpresoj që gjatë 10 ditëve të mbetura të kalojmë edhe ngërçin e fundit”, u shpreh Marc Marquez.

Burimi: http://www.botasot.info/

Alonso rikthehet në Formula 1

në kategorine Formula 1/Sport

Dashuria për garat e Formula 1 do të rikthejë nesër në pistë pilotin spanjoll Fernando Alonso. 2 herë kampioni i botës do të pilotojë nesër makinën McLaren, gjatë testeve që do të kryhen në pistën spanjolle të Montmelo (Barcelonë).

Alonso ka mbërritur sot në Barcelonë, ku ka takuar stafin e makinës britanike dhe nesër pritet të zbresë në pistë për të provuar makinën e re. Natyrisht që ky është një test i thjeshtë, pasi piloti spanjoll këtë sezon nuk do të jetë në Botërorin e Formula 1.

Këtë vit, Alonso fitoi garën 24 orëshe të Daytona në botërorin Endurance. Gjithsesi, përvoja e tij si pilot i Formula 1 do të ndihmojë makinën McLaren në përgatitjen e një njëvendëshe të shpejtë e fituese sezonin e ri.

Këtë vit, McLaren përdor motorin Renault pas “divorcit” me Honda. Makina britanike këtë sezon do të pilotohet nga Carlos Zainz dhe Lando Norris.

Burimi: http://www.botasot.info/

Zendeli: Një sezon në F3 kushton nga 800 mijë euro deri në 1.2 milion

në kategorine Formula 1/Sport

Lirim Zendeli është afër të realizojë ëndrrën e tij për të qenë pilot në Formula 1.

Zendeli ditë më parë është prezantuar me ekipin e SuaberMotorsport në kampionatin e Formula 3, shkruan Insporti.

20 vjeçari do të jetë një nga tre pilotët e njëvendshes “Alf Romeo”, makinë e cila këtë sezon është rikthyer edhe në Formula 1.

Ekipi i SauberMotorsport këtë sezon do të ketë shtatë pilotë, Kimi Raikkonen dhe Antonio Giovinazzi, do të garojnë në F1, ndërsa Zendeli është një nga tre pilotët që do të garojnë në F3, që është dy nivele më poshtë se F1.

Lirimi karrierën e tij e ka filluar në vitin 2010 dhe brenda pak vitesh pritet të garoj në Formula 1.

Zendeli, u shpall kampion i Formula 4 në sezonin e kaluar. Ai bëri paraqitje të shkëlqyer duke fituar më shumë se gjysmën e garave sezonale.

Insporti ka zhvilluar një intervistë me Lirmin, i cili ka deklaruar se është shumë i lumtur që është shqiptari i parë në këtë nivel dhe se është krenar me punën e tij.

-Për cilën ekip ke nënshkruar, kohëzgjatja e kontratës dhe kushtet?

Kam nënshkruar me Sauber Junior Team F3, mundësuar nga Charouz.

– Kur ke dalur nga Karting, rrugëtimi deri te kontrata me Sauber?

Nga karting kam dalur pas përfundimit të sezonit 2015/2016. Në vitin 2018, kam bërë gara në F4, dhe gjatë këtij viti kam fituar kampionatin e Gjermanisë. Më pas kam bashkëpunuar me Charouz në F4, të cilët më mundësuan kontratën me SauberMotorsport.

– Sa kushton një sezon në F3, pjesët mekanike, sigurimi shëndëtsor?

Gjithacka varet nga se çfarë përbërje ka ekipi gjatë sezonit. Një sezon në F3 kushton nga 800 mijë euro deri në 1.2 milion euro. Sigurim shëndetsor e kemi ekstra, për çdo rast.

 – Kontratën e keni nënshkruar për një sezon apo gjysmë sezoni, detajet e sezonit dhe stafi i ekipës?

Kontratën e kam nënshkruar vetëm për një sezon në F3, do të testohem 6 ditë.

(Lirimi nuk i ka bërë të ditura detajet e kontratës)

– Lidhja e F3 dhe F1, a keni qasje ne F1 te Sauber dhe në të dhënat e tyre? 

Si Sauber Junior kam qasje në Sauber Box, pra unë mund të qasem në të dhënat e ekipit të F1.

Burimi: http://www.botasot.info/

Një garë spektakolare në Azi

në kategorine Formula 1/Sport

Botërori i MotoGP, duke nisur nga viti 2021 do të zbarkojë edhe në Indonezi. Lajmin e ka konfirmuar sot Abdulbar Mansoer (presidenti i Zhvillimit Turistik në Indonezi), që dha se ka arritur një marrëveshje me drejtuesit e motoçiklizmit (e firmosur më 21 janr), për të zhvilluar në shtetin aziatik 3 gara, në vitet 2021-2023.

Bëhet fjalë për një pistë të gjatë 4.3 kilometra, gjysma e së cilës do të jetë qytetase, në rrugët e qytetit të Mandalika, në ishullin e Lombok. “Do të ndërtojmë gjithçka nga zero, por do të jetë një pistë spektakolare”, tha Mansoer.

“Do të përdorim pjesë të rrugëve të qytetit për të zhvilluar garën, madje edhe autostradën lokale. Besojmë se shumë shpejt do të përfundojmë punimet dhe më pas vëmendja do të përqendrohet në bokse dhe shkallët e tifozëve”, thanë organizatorët e garës indoneziane të MotoGP.

Burimi: http://www.botasot.info/

E dini si po jeton Schumacheri?

në kategorine Formula 1/Sport

”Kjo është mënyra se si ish-kampioni i Formula 1, Michael Schumacher jeton sot”, ishte titulli i gazetës gjermane ”Bild”, që rindez shpresat e lexuesve të saj për një përmirësim të mundshëm të kampionit të Formula 1.

”Për kujdesin ndaj Schumit ka rreth 10 ekspertë të rehabilitimit, fizioterapistë dhe  infermierë që ndihmojnë familjen e kampionit për të shpejtuar rimëkëmbjen e tij”, thotë ”Bild”.

Në pesë vitet e fundit, zyra e vjetër e Schumit është shndërruar në një dhomë spitalore super të pajisur.

“Asgjë nuk është lënë pa bërë për të shpejtuar shërimin e Schumacherit”, thotë ”Bild”, që  raporton se, ndër të tjera, atij i ofrohet për të dëgjuar zhurmat e makinës së tij të garave.

“Për pyetjen si është gjendja e Schumacherit ka një përgjigje të shkurtër”, thotë ”Bild”.

”Kampioni i Ferrarit nuk është më në rrezik për jetën!”.

Burimi: http://www.botasot.info/

Dominon Raikkonen

në kategorine Formula 1/Sport

Kur kanë mbetur edhe disa ditë nga starti i sezonit të ri të Formulës, skuadrat kanë filluar testet zyrtare parasezonale në pistën e Montmelos, në Barcelonë. Pas dy ditëve të para, që u dominuan fillimisht nga Sebastian Vettel dhe më pas nga Leclerc, të dy pilotë të Ferrarit, dita e tretë u mbyll nën siglën e një ish piloti të skuadrës italiane. Bëhet fjalë për Kimi Raikkonen, i cili tashmë garon me skuadrën e Alfa Romeos dhe tregoi se do të jetë një rival i fortë për të gjithë kundërshtarët. Finlandezi regjistroi kohën më të mirë 1’17″762, duke lënë pas vetes gjermanin e Ferrarit, Sebastian Vettel dhe patriotin e tij, Valteri Botas, që garon me Mercedesin.

Burimi: http://www.botasot.info/

Rosberg nuk ka dyshime: Hamilton do të triumfojë edhe këtë sezon

në kategorine Formula 1/Sport

Nico Rosberg nuk ka dyshime se kush do të jetë kampioni i botës në Formula 1 për sezonin e ardhshëm, madje ish piloti gjerman mendon se pavarësisht ndryshimeve në rregullore, fushata e Lewis Hamilton për titullin do të jetë e suksesshme.

Dy protagonistët kanë patur vërtet shkëndija në pistë kur ishin në të njëjtën skuadër, por Rosberg mendon se britaniku ka vërtet ambicien dhe talentin për të prerë finishin i pari në garën e pikëve.

Lewis Hamilton fitoi 8 nga 11 ndalesat e fundit të Botërorit të kaluar, duke marrë fronin për herë të pestë vitin e kaluar. Kështu ai barazoi legjendën Huan Manuel Fanxjio dhe iu afrua më shumë një emri që ka shkruar historinë si Michael Schumacher.

“Lewis është favoriti absolut sërish, pasi ai po drejton në mënyrë të pabesueshme kohët e fundit dhe për më tepër skuadra e tij po bën një punë të jashtëzakonshme. Ai është një nga pilotët më të suksesshëm në të gjithë historinë e Formula 1 dhe të gjitha bastet janë në favor të tij. Leclerk dhe Verstappen do të jenë surpriza të mëdha gjithashtu këtë sezon në Formula 1”, tha Nico Rosberg.

Këtë sezon ka patur disa ndryshime teknike me pjesën aerodinamike në makina, diçka për të cilën drejtuesit e Formula 1 shpresojnë se do të ulë hendekun e kohës mes ekipeve.


Top Channel

Burimi: http://top-channel.tv/

Shko lartë