Category archive

Diaspora - page 3

Ermali dhe Elvana Gjata në Lucern, shfaqet premiera e filmit të tyre

në kategorine Diaspora

Të shtunën mbrëma në Lucern, Elvana Gjata dhe Ermal Mamaqi mblodhën shumë njerëz në premierën e filmit të tyre “Dy gisht mjaltë”, që ka nisur të shfaqet në të gjitha kinematë e Zvicrës.

E Hënë, 6 Maj 2019 – 0:50
albinfo.ch

albinfo.ch/Foto: Agron Bajrami
Dy yjet e ekranit dhe skenës shqiptare kanë qenë të pranishëm dhe kanë shkëlqyer në mbrëmjen gala të premierës së filmit edhe në kinemanë Bourbaki të Lucernit në Zvicër..
Përveç që është entuziazmuar publiku shqiptar i Lucernit me batutat nga komediani shqiptar Ermal Mamaqi, ai ka njoftuar edhe për suksesin që po tregon komedia shqiptare “Dy gisht mjaltë” në Zvicër.
Tani filmi figuron si filmi numër dy më i shikuar në kinematë zvicerane.
Filmi po shfaqet paralelisht në 11 kinema të Zvicrës ndërsa është paralajmëruar e njëjta komedi të shafqet edhe në Austri dhe Gjermani.
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami
albinfo.ch/Foto: Agron Bajrami 
albinfo.ch/foto Agron Bajrami
albinfo.ch/foto Agron Bajrami
 
 
 
 

Burimi: https://www.albinfo.ch

Së shpejti nis mësimi i gjuhës shqipe edhe në Hamburg

në kategorine Diaspora

E Diel, 5 Maj 2019 – 21:10
albinfo.ch

Gjuha shqipe do të filloj të mësohet edhe në Gjermani.
Kjo u bë e ditur me anë të një postimi të Ambasadës së Kosovës në Gjermani.
“Nga takimi me bashkatdhetarët në Hamburg: së shpejti edhe në këtë qytet fillon mësimi plotësues në gjuhën shqipe! Falemnderit shoqatave shqiptare dhe sidomos aktivistëve Muhamet Idrizit dhe Nadire Rexhepit!”, thuhet në njoftimin e ambasadës.
E njëjta ambasadaë gjatë ditës së sotme njoftoi për takimin informues.
“Në vazhdën e angazhimit për të mbuluar tërë territorin e Republikës Federale të Gjermanisë, sonte në Hamburg në organizimin e disa shoqatave shqiptare si dhe Ambasadës së Republikës së Kosovës në Berlin do të mbahet mbledhje informative me prindërit shqiptarë të interesuar për shkollimin plotësues në gjuhën shqipe në Hamburg.Edhe qyteti në të cilin jetojnë mijëra fëmijë shqiptarë do të nisë me arsimin plotësues në gjuhën shqipe! “, thuhej në njoftimin paralajmërues.

Burimi: https://www.albinfo.ch

Shqiptarët në Ukrainë po e ruajnë identitetin, edhe pa komunikim me vendlindjen

në kategorine Diaspora

E Diel, 5 Maj 2019 – 16:00
albinfo.ch

Ministri i Shtetit per Diasporen (Facebook)
Ministri i Diasporës i Shqipërisë, Pandeli Majko, po qëndron për vizitë në Ukrahinë, me ç’rast është ftuar në një forum diskutimi në Universitetin Shtetëror, ku ka folur për bashkëpunimin mes Shqipërisë dhe Ukrainës, shkruan albinfo.ch.
Sipas një njoftimi në faqen zyrtare, ministri ka shprehur interesimin për bashkëpunim mes shqiptarëve të Ukrainës dhe Shqipërisë, njëherësh ka thënë se komuniteti shqiptar në Ukrainë po ruan identitetin, pavarësisht se nuk ka shumë komunikim me Shqipërinë.
 “Dëshiroj t’ju them se me shqiptarët e Ukrainës kemi një afrimitet të veçantë, sepse në rastin e shqiptarëve të Ukrainës ekziston edhe fenomeni i ruajtjes së identitetit pa komunikim me vendlindjen, që për ne është një provë e fortë e ruajtjes së identitetit shqiptar. Por, edhe një provë tjetër e respektit të thellë që ne kemi krijuar për Ukrainën, pasi ka qenë kjo shoqëri ukrainase që ka lejuar që ky identitet të mos asimilohet, por të vazhdojë të ekzistojë. Kjo është arsyeja që në këto vitet e fundit marrëdhëniet midis dy popujve tanë janë forcuar më shumë”, ka thënë Majko, përcjell albinfo.ch.
Ai po ashtu ka thënë se është i interesuar të krijojë marrëdhënie bashkëpunuese edhe me shqiptarët në vendet e tjera të botës.
Në këtë organizim morën pjesë studentë shqiptarë si dhe studentë ukrainas, të cilët studiojnë kulturën dhe traditën shqiptare.

Burimi: https://www.albinfo.ch

Shkoi si emigrant, sot është një mjek i suksesshëm në Turqi

në kategorine Diaspora

E Diel, 5 Maj 2019 – 13:40
albinfo.ch

Arten Dyrmishi (Facebook)
Në moshën të re u largua nga Shqipëria, e sot është mjek e stomatolog i suksesshëm në Turqi.
Por, për të arritur deri këtu, Arten Dyrmishit iu desh shumë punë e orë pa gjumë, të cilat sot i kujton si momentet më të bukura të jetës së tij.
“Për mua 3-4 vitet e para në Stamboll kanë qenë dhe do te jenë vitet me më shumë vlera në jetën time profesionale, për shkak se këto vite kam punuar 7 ditë në javë, nga pothuajse mesatarisht 20 orë në ditë, sepse gjate ditës studioja dhe çdo mbasdite, pas universitetit, punoja deri në 03:00 të mëngjesit, në një klinike private për të fituar të ardhura e për të jetuar. Dikush mund ta mendojë si një tmerr i vërtetë, po, të them të drejtën, këto kanë qenë vitet më të bukura të jetës time, se falë këtij super sforcimi në jetën profesionale, arrita të përparoja shumë”, ka thënë ai.
Në një intervistë për The Albanian, ai ka treguar se pse zgjodhi pikërisht këtë profesion, përcjell albinfo.ch.
”Që në fëmijëri, në brendësi të shpirtit, më vlonte dëshira për t’u bërë një njeri, i cili do kishte mundësinë t’ju jepte sa më shume buzëqeshje dhe lumturi njerëzve, sidomos atyre që më rrethonin, pasi gjithmonë besoja në thënien “Buzëqeshja është pasqyra e shpirtit”, ka thënë Durmishi.
Jetesa në Stamboll i dha mundësi të punojë në spitale prestigjioze, të mësojë tekonologjinë më bashkëkohore e të punëjë edhe me të famshëm. Por ai nuk e harroi atdheun, madje thotë se vjen shpesh në Shqipëri.
“Fjala “Atdhe” më bën të përjetoj emocione shumë të veçanta dhe gjithashtu më bën të ndjehem krenar. Fakti që unë kam jetuar deri në moshën 18 vjeç në Shqipëri ma bën të veçantë lidhjen time me atdheun. Aktualisht i përjetoj keq situatat aktuale me të cilat përballet Shqipëria në ditët e sotshme. Vij shpesh në Shqipëri dhe shoh që tendenca për më mirë ecën me ritme të avashta krahasuar me vendet fqinje”, ka thënë Dyrmishi.
Ai thotë se në Turqi është pritur shumë mirë, pavarësisht se shkoi si emigrant.
Ndërkaq, Dyrmishi thotë se në vendlindjen e tij duhet t’i jepet më shumë rëndësi arsimit dhe shëndetësisë. Ai uron që në një të ardhme të afërt, shqiptarët të kenë mundësi të mjekohen në vendin e tyre.
“Si rezident në një vend shumë afër Shqipërisë dhe me një zhvillim maksimal në fushën shëndetësore, siç ka Turqia shoh shpesh herë që shumë shtetas shqiptarë vijnë për t’u mjekuar në Turqi, për shkak se diagnoza që i është vendosur nuk ka mundësinë të trajtohet ne atdhe. Dhe ne si shqiptarë që jemi, bëjmë detyrën tonë drejt atdheut, duke i ndihmuar me mundësitë që kemi në dorë”, ka thënë ai.
Ndërkaq, ai ka edhe një propozim për qeverinë shqiptare.
“Nga qeveria shqiptare mendoj se është nevoja e krijimit të një kalendari veprimesh të diasporës, në lidhje me administratën shqiptare dhe të fillojnë të veprojnë për situatat me emergjence aktuale në atdhe”, ka thënë Dyrmishi.
Për të ardhmen, ai ka shumë plane, por ndër të tjerash, ka treguar se po mendon t’u ofrojë mundësi të rinjve shqiptarë për të bërë praktikë te ai.
(Marrë me shkurtime nga intervista e Arten Dyrmishit për thealbanian.co.uk)

Burimi: https://www.albinfo.ch

Afaristi shqiptar nga Gjermania dhuron mijëra euro për spitalin në Mitrovicë

në kategorine Diaspora

E Shtunë, 4 Maj 2019 – 22:00
albinfo.ch

Afaristi shqiptar në Gjermani, Bahri Tahiri, ka dhuruar mijëra euro si kontribut për Spitalin e Mitrovicës, shkruan albinfo.ch.
Lajmin e ka bërë të ditur drejtori i Unionit të Bizneseve Shqiptaro-Gjermane, Bekim Brestovci.
Ai ka bërë të ditur se Tahiri ka dhuruar paisje për spitalin e Mitrovicës në vlerë prej 75 mijë eurosh, ndërsa ka mbuluar edhe transportin e paisjeve në vlerë prej 11 mijë e 500 eurosh.
Brestovci e ka përgëzuar afaristin Bahri Tahiri për këtë kontribut.
“Ky veprim i juaji human, tek shumë persona me nevojë do e zgjojë ndjenjën e besimit që në ballafaqimin e tyre me sëmundjen, ka kush të iu qëndrojë pranë me gatishmërinë për t’iu përmirësuar kushtet gjatë hospitalizimit, për tretman të nevojshëm mjeksor. Vlera e donacionit tuaj prej 75.000€ dhe shpenzimet për transportin e paisjeve në vlerë prej 11.500€, janë një dëshmi e madhe e një gatitshmërie dhe vullneti tē mirë të një mërgimtari për bashkëkombësit e tij dhe vendin në përgjithësi”, ka shkruar Brestovci në facebook, përcjell albinfo.ch.
Për fund, ai ka uruar që aktivitete humanitare të ngjashme të organizohen vazhdimisht.

Burimi: https://www.albinfo.ch

BISH dhe UBISHZ, urojnë besimtarëve musliman ardhjen e muajit të Ramazanit

në kategorine Diaspora

E Shtunë, 4 Maj 2019 – 15:20
albinfo.ch

Unioni i Bashkësive Islame Shqiptare dhe Bashkësia Islame Shqiptare në Zvicër kanë uruar besimtarëve musliman që jetojnë në ardhjen e muajit te Ramazanit.
“Unioni i Bashkësive Islame Shqiptare dhe Bashkësia Islame Shqiptare në Zvicër njoftojnë besimtarët muslimanë se dita e parë e muajit të bekuar të Ramazanit është ditën e hënë, më 06.05.2019, ndërsa namazi i parë i taravisë falet në mbrëmjen e së dielës, më 05.05.2019.  
BISH dhe UBISHZ me këtë rast ju urojnë të gjithë besimtarëve muslimanë që jetojnë në Zvicër ardhjen e muajit të Ramazanit, duke e lutur All-llahun e Lartë që netët dhe ditët e tij të jenë plotë fetarësi, gjallëri, mirësi, harmoni, tolerancë dhe dashuri të ndërsjellë” thuhet në urimin e tyre.
Ata gjithashtu kanë thënë se Ramazani paraqet një mundësi të madhe jetësore për secilin besimtar, pasi që në këtë muaj ai e hap zemrën e tij për të depërtuar në të drita e besimit dhe e fesë; drita e dijes dhe e vetëkontrollit. Në Ramazan është forca jonë, është lidhja jonë më e madhe me Zotin dhe me botën, me njeriun, me familjen dhe me shoqërinë, përcjell albinfo.ch.
“Ne lutemi që ky muaj i bekuar të jetë një muaj i lehtë dhe i begatë për të gjithë ata që do ta kalojnë me ibadet, me vepra të mira dhe që do të gjejnë mundësinë për t’u përmirësuar dhe për t’u bërë më të mirë. Le të sjell ky ramazan paqen dhe sigurinë midis nesh, midis xhemateve tona dhe te të gjithë njerëzit në botë.Magfireti, mëshira dhe falja e All-llahut Fuqiplotë qofshin mbi të gjithë ju”!

Burimi: https://www.albinfo.ch

Filmi shqiptar “2 gisht mjaltë”, vjen me sukses befasues në Zvicër

në kategorine Diaspora

Dy yjet e ekranit dhe skenës shqiptare: Elvana Gjata dhe Ermal Mamaqi kanë qenë të pranishëm dhe kanë shkëlqyer në mbrëmjen gala të premierës së filmit, në kinemanë RiffRaff të Cyrihut

E Shtunë, 4 Maj 2019 – 13:20
albinfo.ch

Komedia “2gisht mjaltë”, pas një suksesi të madh të arritur në kinematë e Shqipërisë, Kosovës dhe Maqedonisë, ka vizutuar edhe Zvicrën, gjegjësisht publikun (kryesisht)  shqiptar të këtij vendi. Dhe, bazuar në shfaqjet e deritashme në kinematë e Cyrihut, Lucernit etj. mund të thuhet se reagimi i këtij publiku është mëse pozitiv. Kjo përgjigje kaq pozitive shpjegohet me etjen e publikut të mërgatës për të parë një film shqiptar dhe sigurisht, me natyrën e lehtë e gazmore që ka komeida si zhanër i cili tërheq publik më të gjerë.

Ndërsa në rastin e “2 gisht mjaltë” ka qenë edhe prania e dy artistëve shumë të njohur nga skena dhe estrada shqiptare: Ermal Mamaqi dhe Elvana Gjata, ajo që i ka dhënë këtij filmi një garancë për sukses.
Dy yjet e ekranit dhe skenës shqiptare kanë qenë të pranishëm dhe kanë shkëlqyer në mbrëmjen gala të premierës së filmit, në kinemanë RiffRaff të Cyrihut. Në skenën e kinemasë ata janë prezantuar nga moderatorja e re, Romina Caraj dhe kanë entuziazmuar publikun me disa batuta dhe fakte që lidhen me filmin.

Vetë filmi, është një komedi situatash, që mbështetet në një rrëfim të lehtë dhe të këndshëm, i cili komunikon mirë me publikun shqiptar, sidomos atë të ri. Me pak fjalë, subjekti është ky: Emma (Remzija) këngëtare dhe Edvini, (pothuaj) mjek, pas një njohjeje aksidentale, vendosin të martohen. Planet e dasmës dhe krahas tyre konfliktet proverbiale “nuse – vjehërr” bëjnë që filmi të shkaktojë disa shpüerthime të qeshurash në mesin e publikut.

Ndërsa nisja për në  muajin e mjaltit, në Karaibe është në fakt nisje e konfliktit të vërtetë të komedisë. Gabimi në prenotimin e biletave rezulton fatal për çiftin e ri. Pasi nuk fluturojnë dot për në Karaibe, ata, për t` i ikur “tersit” vendosin të kalojnë këtë muaj mjalti në bregdetin shqiptar. Por këtu pastaj, me ndërhyrjen e rrethanave dhe njerëzve nga më të ndryshmit, nis dhe përshkallëzohet konflikti në mes të dy të rinjve, që është dhe konflikti i filmit, si subjekt, shkruan albinfo.ch. Situata të ndryshme komike të shkaktuara nga ndërthurrja e faktorëve të ndryshëm, të shoqëruara nga batuta të lezetshme, bëjnë që filmi të ketë deri në fund një rrjedhë të këndshme dhe emocionuese per publikun.

Meritat për sjelljen e këtij filmi në Zvicër i takojnë distributorit Spoton të Cyrihut dhe platformës mediale albinfo.ch , në rolin e promotorit medial. Gjithashtu edhe disa biznese shqiptare të Zvicrës kanë dhënë kontributin e tyre në këtë mes.

Ermal Mamaqi ka qenë përveç njëri ndër bartësit e dy roleve kryesore edhe producent dhe bashkëregjisor i filmit, kështu që ai mund të merret pothuaj si autor i filmit, shkruan albinfo.ch. Ndërsa Elvana Gjata e njohur deri tash vetëm si këngëtare, ka kënduar në kuadrin e rolit, një hit të saj, duke u identifikuar kështu me vokacionin e parë për të cilin njihet nga publiku. Në këtë mënyrë ajo ka përbashkuar këtu disa elementë të rëndësishëm për suksesin e filmit.

Është me interes të thuhet se ky film ka tërhequr në masë të madhe të rinjtë shqiptarë që jetojnë në Zvicër. Në shfaqjet e deritashme është vënë re një prani e një publiku pak më ndryshe nga ai që frekuenton zakonisht aktivitetet tjera kulturore dhe shoqërore të shqiptarëve në këtë vend.
Filmi po shfaqet paralelisht në 11 kinema , në po kaq qytete të Zvicrës. Shfaqja e tij do të vazhdojë gjatë gjithë muajit maj.
Foto: Agron Bajrami

Burimi: https://www.albinfo.ch

Kapen 6 shqiptarë duke punuar në të zezë, shefi thotë: “I kam të familjes”

në kategorine Diaspora

Sipas shefit të restorantit, të punëtorët janë familjarë, të afërt e të largët të tij, të cilët “vetëm po e ndihmonin” dhe për këtë nuk kishin marrë paga

E Premte, 3 Maj 2019 – 18:25
albinfo.ch

Gjashtë shqiptarë pa leje të punës janë kapur nga zyrtarët e doganës, në Goslar, në afërsi të qytetit Braunschweig, Gjermani. Të gjithë ata të enjten ishin duke punuar në një restorant të atyshëm, shkruan presseportal.de.
Siç kanë bërë të ditur autoritetet përgjegjëse të premten, nuk bëhet fjalë për një rastësi por zënia e tyre ndodhi si rezultat i vëzhgimeve dhe dyshimeve të mëparshme, transmeton albinfo.ch. Para disa javësh, autoritete tjera kishin kontrolluar restorantin në fjalë, me ç`rast dy nga punëtorët kishin marrë menjëherë arratinë. Në këtë mënyrë ishin përmbushur kushtet që edhe zyrtarët e doganës të bënin kontrollimin për të verifikuar statusin e punës të punëtorëve të restorantit.
Pasi që kësaj radhe, në saje të një numri më të madh të personelit u bllokuan edhe dyert anësore të lokalit, nuk pati mundësi ikjeje për askënd, përcjell albinfo.ch. Kështu, punëtorët e kapur në befasi, u treguan kooperativë me autoritetet.
Kundër gjashtë shqiptarëve janë iniciuar hetimet mbi dyshimin për qëndrim ilegal në Gjermani. Lidhur me qëndrimin e tyre të mëtejmë në vend do të vendosin autoritetet për të huaj, ku të përmendurit do t`i marrin pasaportat që u është dashur t`i dorëzonin me rastin e kapjes.
Ndërsa pasoja më serioze e kërcënojnë punëdhënësin. Ai ka leje qëndrimi në Gjermani por mund të akuzohet për punësimin ilegal të të huajve dhe për trafikimin e tyre. E gjithë gjoba për të mund të arrijë deri në 500 mijë euro.
Ndërsa ai vetë nuk shihte asnjë problem gjatë kontrollit të bërë në restorantin e tij. Kjo pasi, sipas tij, të gjithë punëtorët janë familjarë, të afërt e të largët të tij, të cilët “vetëm po e ndihmonin” dhe për këtë nuk kishin marrë paga.

Burimi: https://www.albinfo.ch

Migrantët shqiptarë ankohen për mosnjohjen e patentë shoferëve

në kategorine Diaspora

E Enjte, 2 Maj 2019 – 22:40
albinfo.ch

Ilustrim
Mbrëmjen e së enjtes në “Fiks Fare” u trajtua mosnjohja e modelit të ri të lejeve të drejtimit, që janë hedhur nga 24 janari i vitit 2017. Patentat e reja nuk njihen nga shtetet me të cilat Shqipëria ka marrëveshje, pasi këto marrëveshje janë nënshkruar për modelin e vjetër të patentave.
Aktualisht, Shqipëria ka disa marrëveshje të nënshkruara për njohjen reciproke dhe konvertimin e lejeve të drejtimit. Ndërkohë që për të gjitha ato vende, me të cilat nuk ka një të tillë, është e domosdoshme pajisja me leje drejtimi ndërkombëtare.
Në “Fiks Fare” kanë mbërritur ankesa nga disa emigrantë shqiptarë, të cilët ngrenë zërin për mosnjohjen e patentave, edhe pse midis dy shteteve ka marrëveshje.
Një nga këto shtete, me të cilën është nënshkruar marrëveshja dypalëshe, është edhe Italia, por disa provinca të veriut të Italisë nuk i njohin patentat shqiptare.
Polikron Muço që jeton në Firence, pas marrjes së patentës së re që doli në vitin 2017 në një format të ri, ashtu siç janë edhe standardet europiane, kërkoi që ta konvertonte në Itali. Aplikoi për konvertimin e patentës së re, ashtu siç kishte bërë më parë, por kësaj here hasi në vështirësi.
Shteti italian, për shkak të ndryshimit të modelit të lejes së drejtimit, nuk e njeh atë. Ai shpjegon për “Fiks Fare” se në Firence i kanë thënë se konvertohen vetëm lejet e drejtimit në formatin “card”, që në Shqipëri janë lëshuar nga 1 korriku i vitit 2005 deri në vitin 2016. Për modelin e ri të patentave, autoritetet atje i janë shprehur se nuk janë njohur nga shteti shqiptar, shkruan TCH, përcjell Albinfo.ch.
Shqetësime në lidhje me njohjen e patentave, emigrantët shqiptarë kanë pasur edhe në Gjermani. Andi Shkulaku ankohet se, shteti në të cilën ai është zhvendosur dhe jeton prej dy vitesh, nuk e njeh patentën shqiptare. Gjermania, lejen e drejtimit të vendit tonë e njeh vetëm për 6 muaj rezidencë në Gjermani, më pas ky dokument “nuk pi ujë”. Ai i drejtohet “Fiks Fare” të ngrejë shqetësimin e tyre:
“Jeni zëri ynë dhe vetëm te ju besojmë se mund të bëni diçka”, shkruan Shkulaku.
Për këtë problem, gazetarët e “Fiks Fare” iu drejtuan Drejtorisë së Transportit Rrugor, ku drejtori Shkëlqim Gruda shprehet se është në dijeni të situatës në veri të Italisë.
“Nga Drejtoria ndiqen procedurat që merren nga Ministria e Infrastrukturës dhe Energjisë dhe Ministria për Europën dhe Punët e Jashtme. Në dijeninë tonë, nga MIE është bërë gati drafti i V.K.M-së për rinovimin e parakohshëm të marrëveshjes, e cila skadon në dhjetor të këtij viti me Italinë”, sqaron drejtuesi i DPSHTRR.
Sipas Ministrisë së Infrastrukturës dhe Transporteve, konvertimi i patentave shqiptare është njësoj si ai i patentave të vendeve të tjera jo anëtare të BE-së, që kanë nënshkruar marrëveshje dypalëshe me Italinë, ashtu si Shqipëria. Në faqet zyrtare të kësaj ministrie, i vetmi shënim për Shqipërinë është që marrëveshja është e vlefshme për 5 vite, duke filluar nga 25 dhjetori 2014 deri më 25 dhjetor 2019.
Ndërkohë që nga Ministria e Jashtme është bërë me dije se, dy muaj pas daljes së udhëzimit për modelin e ri të patentave, u njoftuan të gjithë përfaqësitë diplomatike dhe ambasadat në të gjithë botën për ta paraqitur në vendet ku operojnë, shkruan TCH, përcjell Albinfo.ch.

Burimi: MEDIAL.mk

Brikena Muharremi: Detyra jonë është t’i shërbejmë komunitetit

në kategorine Diaspora

Brikena Muharremi është kryetare e Shoqatës së Avokatëve Shqiptaro-Britanikë. Ajo është shqiptarja e parë avokate në Angli, e cila shtë e liçencuar si avokate në vitin 2005

E Enjte, 2 Maj 2019 – 20:50
Bekim Dalipi

Brikena Muharremi është bërë i njohur në diasporën shqiptare si juriste londineze që angazhohet në të mirë të komunitetit shqiptar në Angli. Ajo së fundi është vlerësuar nga Qeveria shqiptare në Samitin e Diasporës në Tiranë me çmimin “Ambasadore e Kombit”. Albinfo.ch ka zhvilluar një intervistë me të ku ajo pasqyron organizimin e shqiptarëve në Angli dhe suksesin e tyre atje, duke veçuar emra si Rita Ora e Dua Lipa.
Albinfo.ch:  jeni aktualisht avokatja më e përfolur e diasporës shqiptare. A mund të na thoni për lexuesit tanë kushështë Brikena Muharremi?
Brikena Muharremi: Jam avokate e bazuar në Londër ku jetoj qe 23 vite.  Kam mbi 12 vite përvojë pune në profesion. Kam lindur dhe jam rritur në Kosovë.  Në Angli kam ardhur me vizë, si studente e shkollës së mesme, tre vite para luftës në Kosovë. Arsyeja e ardhjes sime në Angli ka qenë që të shkollohem meqë shkollat në Kosovë në atë kohë u mbyllën dhe ne vijonim mësimin nëpër shtëpi private, i cili nuk ishte mësim adekuat. Pas përfundimit të shkollës së mesme nuk munda të kthehem në Kosovë për shkak të luftës dhe vazhdova studimet universitare në degën e drejtësisë në Londër.  Përfundova studimet dhe trajnimin pranë një firme avokatore dhe u liçencova si avokate në vitin 2005. Jam shqiptarja e parë që është kualifikuar si avokate në Angli.
Albinfo.ch: Kur është fjala për aktivitetin e shqiptarëve që jetojnë në Angli, emri juaj është lakuar shpesh në media.  Si janë të organizuar shqiptarët e Anglisë dhe cili është roli juaj në këtë drejtim?
 Brikena Muharremi: Në Angli janë disa shoqata që i shërbejnë komunitetit shqiptar në fusha të ndryshme.  Unë jam e angazhuar në komunitet përmes Shoqatës së Avokatëve Shqiptaro-Britanikë të cilën e themelova para 3 viteve dhe të cilën e udhëheqi.  Kemi një bord të përbërë nga 7 avokatë dhe si shoqatë kemi katër qëllime kryesore: Promovimin e bashkëpunimit në mes të avokatëve që punojnë në Angli, Kosovë dhe Shqipëri. Avancimin e diturisë në fushën e drejtësisë, përkrahjen e gjeneratave të ardhshme të avokatëve dhe promovimin e sundimit të ligjit dhe çasjes në drejtësi. Këto qëllime synojmë t’i arrijmë duke organizuar ngjarje rregullisht në formë të ligjëratave nga ekspertë të çështjeve të ndryshme juridike. Deri më tani kemi punuar me avokatët dhe gjykatësit më eminentë në Angli dhe më gjërë. Informata rreth aktiviteteve tona mund të gjeni në website-in tonë www.balawyers.co.uk. Numri i avokatëve shqiptarë në Angli është në rritje e sipër që është një gjë shumë pozitive për komunitetin tonë në Angli. Kjo është edhe arsyeja pse mora iniciativën për themelimin e shoqatës, që ne si profesionistë të kësaj fushe të jemi të lidhur, ta përkrahim njëri-tjetrin dhe ti shërbejmë komunitetit.
Jam gjithashtu anëtare e bordit të organizatës joqeveritare Germin, e cila është e bazuar në Kosovë dhe e cila promovon të drejtat e diasporës shqiptare.  Jam e angazhuar në projekte të kësaj organizate që synojnë përmirësimin e sistemit të votës së diasporës dhe përfaqësimin e diasporës në institucionet e vendit të origjinës.
Albinfo.ch: Diaspora shqiptare identifikohet kryesisht me shqiptarët që jetojnë në Zvicër e Gjermani, mirëpo shumë pak dihet për shqiptarët që jetojnë në Angli. Cila është përvoja juaj në organizimin e diasporës shqiptare të Anglisë?
Brikena Muharremi: Komuniteti shqiptar në Angli është relativisht i ri krahasuar me shtete tjera, por brenda 20 viteve të fundit ka arritur të jetë një komunitet shumë i suksesshëm i cili ka prodhuar dhe vazhdon të prodhoj talentë dhe profesionistë të shkëlqyeshëm në fusha të ndryshme.  Shembuj mund t’i marrë superyjet Dua Lipa dhe Rita Ora në fushën e muzikës dhe ka shumë shembuj suksesi në fushën e sportit, ekonomisë, drejtësisë, artit, shkencës, etj.  Meqë jemi komunitet i ri rrjedhimisht edhe organizimi i komunitetit është në zhvillim e sipër, por është duke u bërë me seriozitet dhe me hapa të sigurtë.  Shoqatat shqiptare që funksionojnë në Angli i shërbejnë komunitetit për nevoja të ndryshme duke filluar nga mësimi i gjuhës shqipe e deri tek rrjetëzimi i profesionistëve.  Gjithashtu kemi edhe gazeta, radio dhe media televizive shqiptare me bazë në Londër në shërbim të komunitetit.

Albinfo.ch: Në Samitin e dytë të Diasporës të mbajtur gjatë muajit mars, jeni dekoruar nga Qeveria Shqiptare me çmimin „Ambasador i Kombit“. Cili është kontributi juaj në këtë drejtim dhe çfarë do të thotë kjo për ju dhe shqiptarët që jetojnë në Angli?
 Brikena Muharremi: Vlerësimi që m’u bë në Tiranë është një privilegj dhe nder për mua.  Është një shtytje që të vazhdoj punën që e bëj me komunitetin shqiptar në Angli dhe me diasporën shqiptare në përgjithësi, punë të cilën e kam pasion. Shpresoj që vlerësimet që u bënë në Samit të shërbejnë edhe si frymëzim për të gjithë që puna në komunitetet tona në diasporë, kudo që jemi, të vazhdoj meqë duke respektuar identitetin tonë dhe duke përkrahur njëri-tjetrin jemi më të fortë dhe më të suksesshëm.
Albinfo.ch: Si e vlerësoni ju rëndësinë e Samitit të Diasporës, çfarë punohet aty dhe cilat janë konkluzionet që ju keni nxjerrë nga ky samit?
 Brikena Muharremi: Samitiështë një rast i shkëlqyeshëm meqë i jep mundësi krijimit të një dialogu në mes të diasporës dhe institucioneve të vendlindjes.  Është një hap i Qeverisë Shqiptare në drejtimin e duhur për krijimin e kushteve adekuate që diaspora të japi kontributin e saj në zhvillimin e vendlindjes.  Zhvillimi ekonomik i Shqipërisë dhe Kosovës është më i nevojshëm se kurrë tani duke marrë parasysh gjendjen ekonomike dhe sociale si në Shqipëri ashtu edhe në Kosovë.
Në Samitin e Dytë pati panele diskutimi rreth çështjeve të ndryshme që prekun diasporën si vota e diasporës, zhvillimi ekonomik, identiteti shqiptar dhe turizmi.  Unë isha pjesë e panelit për të drejtën e votës ku prezantova punën time në përmirësimin e sistemit të votimit të diasporës. Bëra thirrje që projekligji i paraqitur në Kuvendin e Kosovës për plotësim-ndryshimin e Ligjit për Zgjedhje të ratifikohet sa më shpejt në mënyrë që t’i mundësohet votimi nëpër ambasada diasporës gjatë zgjedhjeve të ardhshme. Në fund të Samitit përfaqësuesit e Ministrisë së Diasporës bënë një pëmbledhje të konkluzioneve të dala nga secili panel të cilat do të mirren parasysh nga Ministria gjatë punës së saj.
Mendoj që organizimi i paneleve të diskutimit ishte ide shumë e mirë meqë aty patëm rastin t’i shprehim mendimet tona rreth çështjeve të ndryshme dhe dhamë edhe sugjerimet tona konkrete.
 
 
 
 
 
 

Burimi: MEDIAL.mk

Nxënës shqiptarë dhe shkrimtari nga Greqia, vizitojnë Kosovën

në kategorine Diaspora

E Enjte, 2 Maj 2019 – 17:00
albinfo.ch

MDIS
Nxënës të shkollave shqipe në Greqi dhe shkrimtari grek, Dino Kubati, kanë vizituar Kosovën, me ç’rast janë pritur edhe në Ministrinë e Diasporës dhe Investimeve Strategjike, shkruan albinfo.ch.
Nxënësit, bashkë me profesorët e tyre, janë pritur nga ushtruesja e detyrës së sekretares së përgjithshme në këtë ministri, Shyhrete Gosalci, e cila u shpreh e nderuar për këtë vizitë.
“Kemi nderin që sot jeni në mesin tonë. Ministria që disa vjet organizon eksurzione të ndryshme për ruajtjen e gjuhës, kulturës dhe identitetit. Jemi shumë të lumtur që ju kemi këtu dhe është kënaqësi t’ ju mirëpresim”, ka thënë Gosalci, përcjell albinfo.ch.
Ajo po ashtu ka thënë se me ligjin e ri për diasporën, ministria e ka prioritet mësimin plotësues të gjuhës shqipe në diasporë.
Me nxënësit ishte edhe shkrimtari grek, Dino Kubati, i cili e vizitoi Kosovën për herë të parë.
Kurse përfaqësuesi i grupit të shkollave shqipe të Greqisë, Pjerim Lleshi, falënderoi MDIS-in për bashkëpunimin me diasporën.
“Në këtë ministri ka njerëz me zemër të madhe, ngase mendimi i tyre shkon shumë thellë, duke u dhënë mundësinë këtyre nxënësve që nuk kanë lindur në atdheun e tyre, të shohin vendin dhe pikat historike, por edhe të jenë shumë afër me gjuhën shqipe. Andaj ne ju falënderojmë jashtëzakonisht shumë për punën që po bëni, jo vetëm për ne, por për gjithë diapsorën”, ka thënë Lleshi.

Burimi: MEDIAL.mk

A do të këndojë shqip Rita Ora në festivalin shqiptar të Cyrihut?

në kategorine Diaspora

Por, a do të këndojë ajo shqip ne këtë festival?`kësaj pyetjeje ajo i është përgjigjur: “Këtë mund ta zbuloni, nëse do të vini në spektakël”

E Enjte, 2 Maj 2019 – 12:40
albinfo.ch

Keystone
Ylli i pop muzikës botërore, këngëtarja me rrënjë shqiptare, Rita Ora do të paraqitet në festivalin e parë zviceran i cili i kushtohet ekskluzivisht adhuruesve të këngës shqiptare. “Alba Festival” mbahet në fundjavën e fundit të qershorit në Cyrih. Dhe, siç shkruajnë mediet zvicerane, që tash spekulohet nëse ajo do të këndojë me atë rast ndonjë këngë në gjuhën shqipe ose jo.
“Alba Festival” është i pari i këtij lloji në Zvicër e më gjerë. Ai ka vënë vetes synimin që të bëhet festivali më i madh shqiptar në Evropë, transmeton albinfo.ch. Dhe për të merituar një titull të tillë, aty është ftuar veç tjerash njëri ndër yjet më të mëdhenj të pop muzikës botërore, Rita Ora. Prandaj, nuk duket e tepruar ajo që shkruan blick se “Rita Ora do të “kallë” shqiptarët e Zvicrës”.
Më tutje mediet zvicerane duke prezantuar mysafiren e ardhshme, shkruajnë se Rita Ora është e lindur në Prishtinë ndërsa prindërit e saj kanë emigruar në Londër, kur ajo ishte vetëm një vjeçe. Por ajo është gjithmonë e vetëdishme prej nga vjen, transmeton albinfo.ch. “Prindërit e mi më kanë mësuar që të jem krenare me rrënjët e mia”, e thekson ajo gjithmonë në intervistat e saj. Kështu, për angazhimin e saj në favor të vendit të prejardhjes, Kosova që nga viti 2015 e ka emëruar atë ambasadore nderi”.
Por, a do të këndojë ajo shqip ne këtë festival?`kësaj pyetjeje të “20min.ch” ajo i është përgjigjur: “Këtë mund ta zbuloni, nëse do të vini në spektakël”.
Krahas Rita Orës, në “Alba festival” do të paraqiten edhe yje të muzikës së popullarizuar nga Kosova dhe Shqipëria si: Ledri Vula, Elvana Gjata dhe Dhurata Dora.

Burimi: MEDIAL.mk

Detaje për plagosjen e shqiptarit në Gathe

në kategorine Diaspora

36-vjeçari është ende në kujdes intensiv, derisa hetimet po vazhdojnë

E Enjte, 2 Maj 2019 – 9:40
albinfo.ch

(KEYSTONE/Jean-Christophe Bott)
Të dielën mbrëma (28 prill) një shqiptar është plagosur në Gathe të Zvicrës. Policia dhe prokurori kanë dhënë detaje në lidhje me këtë rast, raportojnë mediat zvicerane.
Sipas tyre, në armë zjarri është gjetur pranë viktimës, derisa ende nuk është bërë e ditur nëse me atë armë ishte qëlluar në drejtim të shqiptarit 36-vjeçar, përcjell albinfo.ch.
Ende nuk është e sigurt nëse ai është qëlluar nga një person, ose ishin më shumë.
Sipas mediave zvicerane, mendohet se ai është qëlluar derisa po voziste me veturën e tij. Arma është gjetur pranë kokës së tij.
36-vjeçari është ende në kujdes intensiv. Policia nuk ka dhënë shumë detaje tjera për shkak të zhvillimeve të hetimeve, derisa të gjithë ata që kanë informacione mund të kontaktojnë në numrin 0202/284-0.
Në lidhje me këtë rast ka pasur edhe një video në “Youtube”, e që më pas i është dorëzuar policisë, ku shihen disa dëshmitarë duke e ndihmuar dhe duke e thirrur policinë.
Gjithashtu sipas dëshmitarëve ai është qëlluar nga një veturë në lëvizje, edhe pse nuk është konfirmuar nga policia.

Burimi: MEDIAL.mk

Babai i 17-vjeçarit të ndjerë, me dedikim prekës “Ti po fle”

në kategorine Diaspora

E Mërkurë, 1 Maj 2019 – 20:40
albinfo.ch

Babai i 17-vjeçarit nga Kosova, Rinor Bunjaku, që humbi jetën të premten e shkuar në Oberglatt të Cyrihut në Zvicër ku u gjet në shinat e trenit, i ka dedikuar disa vargje prekëse të birit, transmeton albinfo.ch.
Ai ka shkruar në “Facebook” për djalin që ka ndërruar jetë tashmë. “Ti po fle, e unë ende po pres qe ti me u zgjua, po thërras, ama ti s’po çohesh, më lerë unë të vdes e ti çohu”, ka shkruar ai.
Fatmir Bunjaku ka thënë se nuk po mund ta marrë ende vetën dhe të kuptojë se djali i tij nuk është më.
Familja Bunjaku bën të ditur se Rinori i ndjerë do të varroset të premten, më 3 maj, në orën 13.00, në varrezat “Friedhof Chilisbaum”, Ifangstrasse 100 në Rümlang/ZH.

Burimi: MEDIAL.mk

Foto e ditës: Në një klasë në Londër mësohen shkronjat shqipe

në kategorine Diaspora

E Mërkurë, 1 Maj 2019 – 16:40
albinfo.ch

Gjatë ditës së djeshme, ministri i Diasporës në Shqipëri, Pandeli Majko, ka publikuar një fotografi të cilën e ka cilësuar si “Fotoja e ditës”.
Në fotografinë, e cila është shkrepur Londër, shihet një vajzë e vogël duke mësuar e afër vetes ka abetaren shqipe, përcjell albinfo.ch.
Po ashtu, në këtë fotografi shihet tabela ku janë shkruar fjalë shqipe dhe po mësohet shkronja e parë e alfabetit shqip.
“Foto e ditës. Në klasën e gjuhës shqipe në Kilburn, Londër”, thuhet në faqen zyratre të ministrit.

Burimi: MEDIAL.mk

Humb jetën nën rrotat e trenit shqiptari 17 vjeçar

në kategorine Diaspora

E Martë, 30 Prill 2019 – 22:31
albinfo.ch

Në mëngjesin e të premtes që kaloi, në binarët e trenit në Oberglatt të Cyrihut është gjetur trupi i pajetë i një të riu. Më vonë është konstatuar se bëhet fjalë për shqiptarin 17 vjeçar, Rinor Bunjaku nga Rümlangu i Cyrihut.
Siç merr vesh albinfo.ch nga burimet e afërta me familjen Bunjaku, ende nuk dihen rrethanat e sakta të aksidentit. Dihet vetëm se djaloshi është goditur nga treni dhe është gjetur i vdekur në mëngjesin e premtes, shprehet burimi.
Familja Bunjaku bën të ditur se Rinori i ndjerë do të varroset të premten, më 3 maj në orën 13.00 në varrezën “Friedhof Chilisbaum”, Ifangstrasse 100 në Rümlang/ZH.

Burimi: MEDIAL.mk

5 shqiptarë gjykohen për 1.7 tonë kokainë të fshehur në kuti bananesh

në kategorine Diaspora

Sipas akuzës, ata kanë bërë tregti me 1.7 tonelata kokainë, një sasi droge me vlerë tregu prej 400 milionë eurosh

E Martë, 30 Prill 2019 – 17:40
albinfo.ch

Para trupit gjyqësor të Gjykatës së Landit në Landshut sot ka filluar një proces në shkallë të gjerë për tregtinë me drogë. Pesë të akuzuar mbrohen nga 11 avokatë. Brenda 13 ditëve sa mendohet të zgjasë procesi, duhet të përcaktohet nëse pesë shtetasit shqiptarë kanë përbërë së bashku një bandë droge, shkruan br.de. Ata, sipas akuzës, kanë bërë tregti me 1.7 tonelata kokainë, transmeton albinfo.ch.
Kjo sasi droge ka një vlerë tregu prej 400 milionë eurosh, njofton policia.
Prokuroria publike supozon se ata kanë qenë pjesë e një bande. Sipas akuzës, pesë personat i kanë fshheur pakot e kokainës brenda kutive të bananeve nga Ekuadori. Këto banane ishin sjellë përmes rrugës detare në Hamburg dhe ishte paraparë të shpërndaheshin në supermarkete të ndryshme në Gjermani.
Para se të dërgohen për t`u shitur, bananet duhet të vendosen në deponë për arritjen e pjekurisë. Aty duhet të kalojnë disa ditë për të marrë ngjyrën e verdhë. Dhe pikërisht këtë kohë e kanë shfrytëzuar pesë shqiptarët e dyshuar. Ata akuzohen se kanë hyrë me forcë gjithsej 10 herë në depo të ndryshme nëpër Gjermani, prej nga e kanë marrë kokainën nga arkat e bananeve, përcjell albinfo.ch. Kjo kokainë do të shitej në Holandë për fitime të mira, thuhet më tutje në dokumentet e akuzës.
Grupi u zbulua pasi që diçka shkoi keq dhe kështu nuk u ua arrit të merreshin pakot e kokainës nga depotë e përmendura. Në vend të kësaj, ato, bashkë me bananet, u dërguan nëpër supermarkete gjermane, mes tjerash ehde në dhjetë qytete të Bavarisë, ku kokaina “aterroi” krahas bananeve. Bëhej fjalë për plot 180 kilogramë kokainë.
Lidhur me këtë tregti droge, në majin e vitit të kaluar qenë arrestuar 12 shjqiptarë. Ndaj 5 prej tyre sot, më 30 prill, ka filluar procesi në Landshut. Ata akuzohen për tregti bandash me narkotikë në sasi të madhe.
Vendimi gjyqësor pritet të merret nga fundi i qershorit.
Ministria e Drejtësisë, duke iu referuar rastit, ka bërë fjalë për një “sasi rekorde” të konfiskuar droge që u ka shkuar përdore ta kapin dogana dhe policia, transmeton albinfo.ch. Një zëdhënës i gjykatës ka thënë për BR se bëhet fjalë për një proces të madh droge. Edhe pse në bankën e të akuzuarve nuk kemi ndonjë bos droge të kërkuar botërisht, aty besohet të jenë pjesëtarët e një rrjeti të madh të dyshuar global të drogës.

Burimi: MEDIAL.mk

Dy inxhinierët e suksesshëm shqiptarë në Universitetin e Cyrihut

në kategorine Diaspora

Klajdi Lika dhe Eris Sako janë në Departamentin e Inxhinierisë Mekanike dhe të Proceseve në Universitetin Politeknik të Cyrihut

E Martë, 30 Prill 2019 – 11:20
albinfo.ch

Inxhinierët shqiptarë, Klajdi Lika dhe Eris Sako, pjesë e stafit të inxhinierisë të aplikuar të ekipit të Laboratorit të Sistemeve Robotike në Institutin e Robotikës dhe Sistemeve Inteligjente, ETH Zürich, Zvicër, përcjell albinfo.ch.
Prej më shumë se dy vitesh, inxhinierët e talentuar shqiptarë, Lika & Sako, janë pjesë e pandashme e Departamentit të Inxhinierisë Mekanike dhe të Proceseve në Universitetin Politeknik të Cyrihut (ETH ZÜRICH), një nga 10 universitetet më të mira të botës ku dizenjohet e ardhmja e e robotikës së aplikuar, transmeton faqja zyrtare e Ministrisë së Diasporës.
Roboti i avancuar i Universitetit Politeknik të Cyrihut që mban emrin ‘ANYMAL’ është zhvilluar pikërisht edhe me kontributin e paçmuar të këtyre inxhinierëve të talentuar shqiptarë si pjesë e ekipit zhvillues.
Ndjehemi krenarë për këto asete intelektuale dhe teknologjike që nderojnë shqiptarët në botë, të cilët pasurojnë edhe më shumë Brandin Intelektual Të Kombit.

Burimi: MEDIAL.mk

I lindur dhe rritur në Itali, por i pasionuar pas traditave shqiptare

në kategorine Diaspora

Kristiani së bashku me shqiptarë të tjerë që jetojnë në Itali do të hapin edhe një shkollë shqipe

E Martë, 30 Prill 2019 – 9:00
albinfo.ch

Kristian Zefi, një i ri shqiptar në Itali, me origjinë nga Shkodra është i pasionuar pas ndërtimit të lahutave dhe luajtjes së instrumenteve të muzikës popullore të veriut të Shqipërisë.
Përveç tingujve të çiftelisë, Kristiani është i pasionuar edhe pas etnografisë, zakoneve dhe traditave, mitologjisë, këngëve dhe poezive epike shqiptare.
“Jam 21 vjeç punoj si programues elektronik, tek një firmë që prodhon makineri industriale, jam në programimin dhe kolaudimin elektrik të makinerive”, nis rrëfimin e tij Kristiani.
Në makinën e tij personale ka një objekt, që e bën atë të veçantë nga automjetet e tjera.
“Kisha një shok që kishte një shtypëse 3 D dhe i kërkova të më bënte një shqiponjë dhe shqiponjën ia kam vënë përpara. Tashmë makina ime nuk është Alfa Romeo, por është Alba Romeo”, thotë ai, raporton “ATSH”.
Teksa tregon si nisi pasioni i tij për veglat muzikore të Malësisë së Madhe, Kristani shprehet se “e fillova me pasionin dhe dashurinë për traditat shqiptare, që nga mosha 15-16 vjeç kur mësova shumë për kulturën dhe traditën italiane dhe thashë çfarë kemi ne shqiptarët më pak se italianët”.
“Kështu nisa të pasionohem me historinë e popullit tonë në lashtësi me traditat, me muzikën, veshjet dhe folklorin”, nënvizon ai, përcjell albinfo.ch.
I veshur me veshje popullore, ai tregon se “kur më njohin pyesin po ky djalë jeton në këtë botë apo jo, unë përgjigjem po, se jam i diplomuar për elektroteknikë dhe kam dalë ndër nxënësit më të mirë të klasës sime. Telefonat i kam përdorur se ndryshe nuk do i njihja këto gjëra. Po me kalimin e kohës në vend që të rrija ulur duke parë Facebook e Instagram kërkoj këto gjëra që ti përjetoj edhe njerëz këto gjëra për ti nxjerrë në dritë”.
Kristiani rrëfen pasionin e tij për krijimin e çiftelive dhe kostumeve popullore. “Këto janë të gjitha punimet e mia, çiftelia , lahuta dhe veshja kombëtare, modele autentike të vjetra të krahinave të Malësisë së Madhe dhe të Dukagjinit. Duke filluar nga veshja qytetare e malësorëve aristokratë, veshje e bajraktarëve, të Dukagjinit dhe veshje e fshatarëve të thjeshtë të burrave të Malësisë së Madhe”, thotë ai.
Në fëmijërinë time, shton ai, kam pasur shumë pasion arkeologjinë, sepse kur isha fëmijë më pëlqenin dinozaurët etj.
“Pasioni im që në fëmijëri kanë qenë për gjërat e vjetra, të lashta. Për të ditur si kanë jetuar njerëzit më parë, çfarë kanë veshur si kanë respektuar njëri tjetrin etj”, shprehet Zefi.
Sipas tij, simboli që i bën më shumë përshtypje të huajve është mbushja e veshjeve tona me fije ari.
“Ne e kemi pasur prej perëndisë, apo kohëve të lashtë që të dukemi. Edhe këtë traditë e kemi marrë brez pas brezi që të dukemi sa më mirë”, thekson Kristiani.
Shpesh, sqaron ai, më pyesin si mundet një djalë i ri, lindur e rritur në Itali të merret me këto gjëra.
“Edhe unë i pyes si mundet që ju lindur e rritur në Shqipëri të mos merreni me këto gjëra. Fatkeqësisht rinia shqiptare që lind e rritet ne diasporë nuk është shumica si unë, edhe të jetë si gjysma ime do ishte mirë, se unë jam pak i ekzagjeruar”, shton ai.
Kristiani së bashku me shqiptarë të tjerë që jetojnë në Itali do të hapin edhe një shkollë shqipe.
“Në qytetin e Astit në Itali bashkë me qytete të tjera kemi themeluar një shkollë shqiptare ku u mësojmë fëmijëve abetaren. Inaugurimi i kësaj shkolle do të jetë më 21 shtator, do marrin pjesë shumë personazhe të artit dhe kulturës shqiptare. Aq më shumë të jemi aq më mirë është”, shprehet ai.
Kristian Zefi, 21 vjeç, lindur e rritur në Itali e do shumë vendin e tij, por veçanërisht tokën shqiptare.
Ai ka një mesazh për të gjithë të rinjtë: “Mos e lini tokën shqiptare”.

Burimi: MEDIAL.mk

Kur Letërsia puqet me xhazin dhe botën magjike të gruas

në kategorine Diaspora

“Mos harro asnjëherë se të luash xhaz është si të rrëfesh një histori !”M.Fermine. Rrëfej unë,  gruaja (Shtëpia Botuese « Onufri »), përkrah 69 gra-të e një burri,(Shtëpia Botuese « Skënderbek Book »)

E Hënë, 29 Prill 2019 – 23:20
Mimoza KUCHLY

Histori nga bota e gruas që vrapojnë nga një faqe linbri në një qytet, në një shtet dhe e veçanta e tyre mbetet se rrëfimet apo çdo portret i tyre bëhet në shqip. U ndodha jo rastësisht në ambientet e Universitetit Popullor në Gjenevë.
Mikja e vjetër, bashkëpatriotja beratase me një karrierë të gjatë në botën e librit si bibliotekare që nga Berati –Franca e së fundmi Zvicra, Enriketa Kalldrëmxhiu Barbey me pasionin dhe vlerësimin që ka për librin organizoi me shumë elegancë një mbrëmje ku të përballeshin aspak në debat dy autorë të cilët në epiqëndër të librit të tyre kishin gruan. Arbër Ahmetaj, tashmë një autor i njohur në letërsinë jo vetëm shqipe me « 69 gra » dhe libri im i parë « Rrëfej unë, gruaja » trokitën në vatrën e Univeristetit Popullor në Genevë ku gjetën mikpritjen e një organizimi  logjistik tepër të kujdeshëm të zonjës Albana Krasniqi. Gjithçka në konceptin e këtij organizimi kishte në qëndër të vëmendjes, dëshirën e prezantimit të vlerave shqiptare që edhe pse në një vend të huaj energjia dhe konaku së bashku me kuzhinën të bënin të ndiheshe aspak e huaj. Dy autore, një zonjë dhe një zotëri, të cilët nuk janë e natyrisht nuk do të jenë kurrë të vetmit apo të fundit që hyjnë në skutat më të fshehta të gruas, në pasionet dhe dëshirat, në ëndrrat dhe përpjekjet e saj për të njohur vetveten, nga ku nis dhe paqja e një bote të tërë.
E natyrisht, Keti, njohëse e mirë e vlerave femërore, e letërsisë nuk e la punën përgjysmë. Prezantimi, leximi, pyetjet, bashkëbisedimi, u shoqëruan nën tingujt e muzikës xhaz nën mbikqyrjen e të apasionuarit David Barbey e kritikut të kësaj muzike Michel Barbey. Kur flet për shpirtin e paqtë të një gruaje duket se ai nuk është veçse një instrument ku çdo prekje jep një tingull, çdo tingull një melodi ashtu si pjesëzat muzikore të zgjedhura nga Chloé Barbey m eflautin e saj magjik. Pyetjet me humor të vajzës energjike Aina, misionarit të paqes Tahir Shabani, emocionet e pedagoges Drita Veshi,  kuriozitetet rreth letërsisë së Arbërit nga Besa Myftiu, petagoge, autore dhe kritike letrare tashmë e njohur në gjuhën shqipe dhe franceze; zonjës ambasadores Margarita Gega; recitimi i Afërdita Cipit ardhur nga Belgjika për këtë takim me plot të papritura u pasuan nga të tjera bashkëbisedime rreth gotës së verës, gatimeve krejtësisht shqiptare e këngëve spontane në grup (natyrisht ) beratase, shkodrane, etj shoqëruar nga zëri i ëmbël i këngëtares sonë Mimoza Nazarko.
I falenderoj shqiptarët-gjenovezë të cilët sollën, transmetuan dhe na bënë të ndihemi krenarë për integrimin e tyre të plotë pa I shkëputur rrënjët prej atdheut.
Një mbrëmje me emocione që moderatorja Enriketa Kalldrëmxhiu Barbey dhe grupi i drejtuar nga Albana Krasniqi, nuk mund të ketë veç një falenderim të përzemërt dhe « paçi sa më shumë emocione të tilla shqip ».
(Mimoza KUCHLY, Autore)

Burimi: MEDIAL.mk

Policia në ndjekje të kosovarit, akuzohet për vrasje gjatë garës me vetura

në kategorine Diaspora

Në rastet kur këto gara shkaktojnë vdekjen e ndonjë personi, dënimi mund të shkojë deri në 10 vjet burg

E Hënë, 29 Prill 2019 – 19:40
albinfo.ch

Në Moers, Gjermani, një grua ka vdekur si pasojë e një gare ilegale me makina. Pas vdekjes së gruas 43 vjeçare po zhvillohen hetime për vrasje ndaj personit të dyshuar si shkaktar i vdekjes, shkruan tag.24.de.
I dyshuari me këtë rast është një shtetas i Kosovës, i cili, sipas prokurorisë, është duke qëndruar jashtë Gjermanisë, dhe saktësisht, në Kosovë, transmeton albinfo.ch. Atje, sipas disa medieve gjermane, ai ka “lidhje të forta”.
Aktualisht po shqyrtohet mundësia që ndaj tij të iniciohet edhe një fletarrest ndërkombëtar. Ndërkohë prokuroria tashmë ka publikuar edhe emrin dhe fotografinë e tij. Bëhet fjalë për personin me emrin Kushtrim H., 21-vjeçar.
Te rasti i tij mund të gjejë zbatim paragrafi i ri, 315d, për “raserët”. Ky paragraf mundëson që pjesëmarrësit e garave ilegale të ngarjes së shpejtë të makinave, nga tetori i vitit 2017, të dënohen më ashpër se më parë. Në rastet kur këto gara shkaktojnë vdekjen e ndonjë personi, dënimi mund të shkojë deri në 10 vjet burgim.
Në rastin konkret, dy makina të fuqishme kanë garuar në rrugën me dy korsi brenda qytetit Moers. Njëri prej tyre, sipas dëshmitarëve, ka provuar të tejkalojë me merceesin e tij rivalin e vet dhe kështu ka kaluar në korsinë tjetër. Gjatë një kryqëzimi, ai është ndeshur me një makinë të vogël të një gruaje 43 vjeçe, e cila ka pësuar lëndime të rënda dhe pas pak ditësh ka vdekur.

Burimi: MEDIAL.mk

Eva Belishova shpallet piktorja e vitit nga revista amerikane

në kategorine Diaspora

E Hënë, 29 Prill 2019 – 17:40
albinfo.ch

“Destig 5”, revista e njohur amerikane e ka shpallur piktoren shqiptare, Eva Belishova “Top Artist“ për vitin 2019.
E njohur në shtetin e Kalifornisë, Belishova ka tërhequr vëmendjen e kritikës dhe disa nga pikturat e saj janë pjesë e një interviste të gjatë në “Destig 5”.
Kur ishte vetëm 10 vjeç, babain e saj, një ndër mjekët më të mirë të vendit, e arrestuan. “Kështu që, në moshën më të re kuptova se ç’do të thotë të jetosh nën një regjim diktatorial dhe mësova sesi t’u bëj ballë poshtërimeve, gënjeshtrave dhe korrupsionit të një shteti të degraduar”, shprehet ajo për revistën.
E larguar që në vitin ’90 nga Shqipëria, tashmë ajo ka 18 vite që pikturon, duke i dhënë mençurinë për të kuptuar se artisti kurrë nuk pushon së mësuari.
Veprat e saj janë shfaqur në ekspozita dhe nëpër galeri në zonën e gjirit të San Franciscos. Ajo ka qenë pjesë e “Studios së Hapur” të Marin Countyt. Punimet e saj janë pjesë e koleksioneve private në San Francisco, Londër dhe Nju Jork.
Krijimtaria e saj është kësisoj shpirtërorja. E pyetur të tregojë për veprën e saj, artistja shprehet se pjesa më e madhe shumështresore e ngjyrave shtrihen në telajo, ku ngadhënjimi i fushave koloristike shkrihet me imazhet krejt të papajtueshme. Me të gjitha forcat, ajo beson se jeta e saj mbetet një telajo e papërfunduar.
Pikturat e saj përshkruhen si vepra prezantojnë ndershmëri, përulësi dhe përkujdesje ndaj sojit njerëzor, për të cilin, artistja shprehet se ka një dashuri të dhimbshme. Ajo e përfundon intervistën duke u shprehur se beson me gjithë shpirt, se arti është firma e vetme autentike e qenies njerëzore, transmeton Observer, përcjell Albinfo.ch.
 

Burimi: MEDIAL.mk

Diaspora, model i suksesit dhe i të arriturave

në kategorine Diaspora

E Hënë, 29 Prill 2019 – 13:20
albinfo.ch

Presidenti i Kosovës, Hashim Thaçi dhe kryeministri Ramush Haradinaj po qëndrojnë për vizitë zyrtare në Berlin të Gjermanisë, shkruan albinfo.ch.
Ata janë takuar edhe me disa bashkatdhetarë atje. Sipas Haradinajt, vizita zyrtare në Berlin është rast i mirë që ta forcojmë edhe lidhjen tonë bilaterale që e kemi Kosovë – Gjermani. 
“Emocion i veçantë sa herë takohem me bashkatdhetarë kudo, sikurse edhe sot në Berlin të Gjermanisë. Diaspora jonë, ndër vite ka qenë shtyllë e konsolidimit të shtetësisë së vendit, përkrahje e parezervë e ekonomisë tonë dhe tani, model i suksesit dhe të arriturave. Në prani të bashkatdhetarëve tanë, shpreha falënderimin për shtetin gjerman, që po vazhdon të mbajë qëndrim konsistent, që të mos dëmtohet integriteti territorial dhe shtetësia e Kosovës“, ka shkruar Haradinaj. 
 Haradinaj gjithashtu ka thënë se ndjehet krenar kur sheh dhe takon futbollistë të ligave europiane, pushtues të top listave muzikore, arkitektë, artistë, inxhinierë, mjekë, ndërmarrës të zot, që jo vetëm na bëjnë krenar për suksesin e tyre individual, por i japin paraqitjen e merituar shtetit të Kosovës, duke e lartësuar flamurin dhe identitetin tonë.
Ndërsa presidenti Thaçi ka thënë se diaspora jonë në Gjermani, tash e katër dekada, pareshtur i ka mbështetur të gjitha proceset në Kosovë: lirinë, pavarësinë, shtetndërtimin. Për këtë të fundit, së bashku mund të bëjmë edhe më shumë. 
“Në Gjermani kemi shumë biznesmenë të suksesshëm, të cilët me investime në Kosovë e kanë ndihmuar edhe zhvillimin ekonomik dhe rritjen e mirëqenies së qytetarëve tanë. Jam shumë krenar me rrëfimet e sukseseve të tyre në Gjermani“, ka shkruar Thaçi.

Burimi: MEDIAL.mk

Marko Caka, aktori i suksesshëm shqiptar në Hollywood

në kategorine Diaspora

E Diel, 28 Prill 2019 – 11:40
albinfo.ch

Marko Caka është aktori, i cili ka arritur të realizojë ëndrrën e tij dhe të ketë një karrierë të suksesshme në Hollywood.
Marko Caka emigroi ilegalisht në Greqi në vitin 1992. Në Greqi jetoi për 19 vjet dhe më pas vendosi të largohej drejt Amerikës.
Për rreth 10 vjet ai ishte korrespondent i disa mediave dhe gazetave. Marko u birësua në Greqi nga një familje greke, dhe gruaja që e birësoi për Makon do të jetë gjithmonë si një nënë e dytë. Kriza ekonomike greke ishte një nga faktorët e largimit të tij në Shtetet e Bashkuara të Amerikës, transmeton “TCH”.
Janë mbi 80 filma ku Marko Caka ka interpretuar, si dhe ai ka qenë pjesë e klipit muzikor të J Balvin, përcjell albinfo.ch.
Aktualisht ai është duke punuar në disa filma në Hollywood. Si arriti ai të ishte pjesë e audicioneve në filmave të Hollywood? Dhe si Steven Spielberg zgjodhi nga një numër shumë i madh aplikuesish në audicion Marko Cakën.

Burimi: MEDIAL.mk

Shoqatat shqiptare dhe ato arbëreshe lidhin marrëveshje bashkëpunimi

në kategorine Diaspora

E Shtunë, 27 Prill 2019 – 23:00
albinfo.ch

FNAI (Facebook)
Me qëllim të promovimit, ruajtjes së gjuhës dhe traditave kombëtare shqiptare në komunitetin arbëresh, Federata e Shoqatave Shqiptare dhe Federata e Shoqatave Arbëreshe, kanë lidhur marrëveshje bashkëpunimi, shkruan albinfo.ch.
Lajmin e kanë bërë të ditur nga FNAI, me ç’rast thanë se palët kanë shprehur entuziazëm për njohjen e veprimtarisë së komunitetit arbëresh, ruajtjes së gjuhës dhe traditave kombëtare.
“Ky takim, i pari i këtij lloji, ka një rëndësi të veçantë dhe i hap rrugën një bashkëpunimi të nevojshëm e te frytshëm midis dy federatave dhe më gjerë, midis aktivisteve të këtyre organizatave. Kjo do të bëjë që diaspora të jetë edhe më aktive në jetën e vendit tonë, duke shtruar probleme e kërkesa, por edhe duke dhënë ndihma siç është bërë, me investime, ndihma humanitare etj”, thuhet në njoftimin e federatës shqiptare, përcjell albinfo.ch.
Me ftesë të FNAI-së, në Breshia të Italisë, u takuan presidentët e shoqatave Anila Cenolli dhe Damiano Guagliardi, të cilën nënshkruan marrëveshjen, përmes së cilës po synojnë të bëhen një forcë më e madhe.
“Ka ardhur momenti të bëhemi dhe prezantohemi si forcë e madhe, aktive dhe e domosdoshme përpara istitucioneve tona, në mënyrë që ky kontribut të thellohet dhe strukturohet në mënyrë zyrtare. Në këtë drejtim, një ndihmë e madhe vjen nga manifestimet kulturore dhe artistike, të cilat kanë një rol të veçantë në ruajtjen dhe transmetimin e traditave tona ndaj brezave të ardhshëm, por edhe në kërkimin e të drejtave të emigrantëve shqiptarë”, thuhet tutje në njoftim.

Burimi: MEDIAL.mk

Shko lartë