ADEMI: Shkarkimi i Ziberit, veprim i turpshëm

/

Zëvendësimi i Arben Zyberit me Aleksandar Stojanovin nga ana e LSDM është dëshmi për nevojën e themelimit të Gjykatës së lartë për barazi dhe antidiskriminim.

Arbër Ademi nga Bashkimi Demokratik për Integrim në një deklaratë për media theksoi se shkarkimi i Drejtorit të Qendrës për Shëndet Publik në Shkup Dr. Arben Ziberi dhe zëvendësimi i tij me Aleksandar Stojanov është një veprim i turpshëm i hakmarrjes politike, një sulm ndaj lirisë së fjalës dhe demokracisë.

“Dr. Arben Ziberi ishte një nga shtyllat në luftën tonë kundër pandemise, si Drejtor i Shëndetit publik per Shkupin ai i ka shërbyer vendit dhe qytetarëve me një përkushtim të jashtëzakonshëm. Aftësitë dhe profesionalizmi i tij nuk janë vënë kurrë në dyshim. Shkarkimi i tij për një deklaratë në mediat sociale, të cilën ai e lëshoi në funksionin e tij si kandidat për deputet nuk është gjë tjetër veçse një veprim frikacak i hakmarrjes politike të partisë qeverisëse maqedonase LSDM.

Arsyeja është më se e qartë pasi vetëm disa ditë më parë xhaxhai i Arbenit, Naser Ziberi njoftoi kandidaturën e tij për kryeministrin e parë shqiptar të Maqedonisë së Veriut dhe për të sfiduar dypolshin maqedonas të pushtetit me të cilin po përballemi në këtë vend.

Prekja e familjes së një kandidati të një komunitetit të dytë në vend  është diçka që kujton regjime autokratike dhe kohë të errëta në historinë tonë. Është diçka  e egër dhe e papranueshme në një demokraci moderne. Është  gjithashtu një akt diskriminimi – Arbeni nuk do të ishte pushuar nga puna nëse ai ishte maqedonas dhe që pasardhësi i tij quhet Aleksandër nuk është rastësi por një rast i qartë diskriminimi dhe përpjekja e dobët e LSDM-së për të bërë pikë të lira politike midis votuesve maqedonas ne zgjedhje”, tha Ademi, duke shtuar se i bënë thirrje Komisionit anti-diskriminues të veprojë menjëherë dhe të hetojë këtë rast.

“Nga pikëpamja juridike, pushimi nga puna është kundër parimit të lirisë së fjalës dhe nuk bazohet në ndonjë mangësi profesionale të Dr. Arben Ziberi. Dhe për të qenë shumë e qartë: Nëse një deklaratë e diskutueshme e Facebook është një arsye për shkarkimin, gjysma e ministrave të LSDM-së përfshirë edhe ish-kryeministrin Zaev duhej të ishte larguar nga pozicionet e tyre disa herë.

Fatkeqësisht, ky rast nuk është i vetëm në vendin tonë. Edhe nëse kemi arritur barazi me ligj, ne akoma po ballafaqohemi me mungese te vullnetit politik per ta implementuar atë barazi. Ende kanë mbetur shume xhepa te rezistences ndaj barazise dhe gjithashtu ne shume raste drejtësia është e njëanshme etnike”, u shpreh mes tjerash Arbër Ademi.

Edhe përkundër gjithë përpjekjeve dhe reformave dhe rritjes se përfaqësimit ne gjykata por edhe në institucionet e tjera shtetërore, shqiptarët ende përballen me disavantazhe, tha me tej Ademi. Kjo, shtoi ai, është arsyeja pse ne kërkojmë Kryeministrin e parë shqiptar, sepse vetëm atëherë do të kuptojnë politikanët maqedonas, se ata nuk kanë monopole të pushtetit, se ne po jetojmë në shekullin XXI, ku të gjithë qytetarët duhet të kenë të drejta të barabarta.

“Me një Kryeministër shqiptar, ne gjithashtu do të instalojmë një Gjykatë të Lartë të Barazisë, e cila do të hetojë të gjitha çështjet etnike të njëanshme në gjyqsore dhe administratë dhe ku shqiptarët dhe etnitë e tjera jo-shumicë mund të apelojnë kundër diskriminimit.

Kjo Gjykatë e Lartë e Barazisë do të ketë fuqinë e plotë të një Gjykate të Lartë dhe mund të rrëzojë vendimet diskriminuese të të gjitha institucioneve shtetërore. Ishte koha për të krijuar një shoqëri të barabartë në Maqedoninë e Veriut, ku të gjithë qytetarët kanë të njëjtat të drejta dhe shanse të njejtë”, tha Arbër Ademi nga BDI.