Meta takohet sërish me Bashën: E porosita të ketë kujdes nga provokimet dhe të vijojë punën në Këshillin Politik

Ilir Meta ka zhvilluar një takim paraditen e sotme me kreun e PD-së Lulzim Basha.

Ky takim mes tyre është i treti brenda korrikut. Ndërkohë biseda zbardhet nga vetë Meta:

“Sapo përfundova një takim me kërkesën time me Kryetarin e Partisë Demokratike dhe liderin e Opozitës së Bashkuar z.Lulzim Basha.

E sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit.

E falenderova për kontributin konstruktiv në arritjen e Marrëveshjes së 5 qershorit dhe i kërkova të vazhdojnë punën në Këshillin Politik në frymën e konsensusit duke mos rënë pre e asnjë provokimi.

Inkurajova vijimin e bashkëpunimit të ngushtë me të gjithë partnerët e investuar për çeljen sa më parë të negociatave të anëtarësimit të Shqipërisë me Bashkimin Europian dhe që kanë mbështetur Këshillin Politik në frymën e konsensusit dhe gjithëpërfshirjes” shkruan Meta.